24ê êlule de çarçewa tehqîqatêkê 2022yî de polîsanê tirkan eşt MED-DER, Payîz Pirtûkî û Kooperatîfê Ziwan û Hunerî yê Anka ser û 30 kesî destbend kerdbî.

Temsîlkaranê Platformê Kede û Demokrasîyî yê Amedî MED-DER de atolyeya kirdkî organîze kerd. Hemşaredara Sûrî Fatma Gulan Onkol û temsîlkarê xeylêk dezgehan tewrê atolye bîyî. Atolye de sereştişî ameyî protestokerdene û ame vengdayene ke kesê ke ameyî destbendkerdene wa bêrê veradayene.

Atkîvîsta ziwan û kulturî Nesrîne Şanli dersa 'Qirkerdişê Ziwanî' daye. Şanli hêrişê vera ziwan kulturê kurdan şermezar kerdî û nê vatî: ''Nuşteyanê hîşyarkerdişî yê trafîkî ra heta gonvenda ma tim hêrişî est ê. Badê govende û nuşteyanê kurdkî nika zî mamosteyê ma yê ke dersa kurdkî danê ameyî destbendkerdene. Ma reyna nê polîtîkayan şermezar kenê. Seserrî yo vera ziwanê kurdkî poltîkaya qirkerdişî yena rayraberdene. Nika zî kesê ke kurdkî qisey kenê yan zî deyîranê kurdkî vanê yenê qetilkerdene û tepiştene. Otorîterî çend îdîa bikerî, vajê vera kurdkî qedexe çîn o zî herfê x, w, q, ê Tirkîya de qedexe yê. Seba ke nê herfî nasnameyê ma de nînê şuxilnayene nameyê ke yenê panayene ê zî bêmana manenê. Ma do bi qiseykerdişî ziwanê xo cewabê nê hêrişan bidê.''