Komîteya Heqanê Merdiman a Meclîsa Parlamenteran a Teşkîlatê Hemkarî û Asayîşî yê Ewropa (AGÎT PA) derheqê operasyonanê qirkerdişê sîyasîyî de, ke bi desan îdarekarê partî û endamê HDPyî zî tede, nizdê 300 kesî gîrîyabî binê nezaretî reaksîyon ramot.
Beyanat de nê îfadeyan rê ca ame dayene :
“Ganî peynî ro binçimgirewtiş û tacîzo ke Tirkîye de hemverê muxalifanê sîyasîyan de yeno kerdene bêro ardene. Bi taybetî zî verê weçînitişo herêmî ke do serrna biyero viraştene de zaf muhîm o ke partî û endamî fikir û wesfanê xo bê zordarîya hukmatî îfade bikerê. Endîşeyê Tirkîye yê asayîşî ganî seva ke muxalifî bêrê hedefgirewtene nêrê sûyîstamalkerdene. Hema zî xeylî serekê şaredarîyan estê ke şarî ê weçînayê, la qeyûmê ke hetê hukmatî ra ameyê wezîfedarkerdene herinda înan girewtê. Bi nê hawayî binpaykerdişê îradeyê weçînitoxan nêno qebûlkerdene. Ma veng danê erkdaran ke peynî ro kerdişanê bi nê tewiran biyarê. “
GANÎ MENDIŞÊ ÎNAN Ê SERÊ KARÎ NÊRO ASTENGKERDENE
AGÎT PAyî beyanatê xo de ca da îfadeyêkê Dokumentê Kopenhagî yê 1990ê AGÎTî ke vano: „Hetê qanûnan ra namzedê ke reya elzeme girewta cayo ke weçînîyayê ganî musade bidîyo ke ûca bi hawayêkê munasibî bica bibê û musade bidîyo ke dewrê erkê xo de heta wextê înan bibo de dewam bikerê, halêkê eksîyî de proseduranê demokratîk, parlamenter û qanûnîyan ra gore çarçiwaya qanûnan de peynî ro erkê înan yena ardene“. Sere de Tirkîye heme dewletanê beşdaran nê dokumentî qebûl kerdo.
