Sîyasetmedaro kurd Ahmet Turkî aktîvîteya Kampanyaya 'Her kesî rê edalet' ya HDPyî de qisey kerd. Turkî bale ante zextanê vera kurdan û hêzanê demokrasyî ser û vat: Rejîmê zordarî do rojêke hesabê kerdişanê xo bidê.

Ahmet Turkî vat: ''Wazenê ke ke HDPyî bikerê bêtesîr la partîye bêro qefilnayene zî têkoşîn do dewam bikero. Sey verî nika zî qefilnayîşê partîye do verê têkoşînî de ansten nêbo. Heta ewro xeylêk partîye ma ameyî qefilnayene la kurdî û êyê ke demokrasîyî ra bawer kenê no têkoşîn canêverda.  Parîyê ma yê sîyasîyî bêrê qefilnayene zî semedê demokrasî û azadîye no têkoşîn do dewam bikero. Ewro qefilnayîşê partîye hesabê îqtîdarî yeno. MHP zor dano înan la partîya îqtîdarê hesabê xo kena. Hesabê îqtîdarî oyo ke partîye bikero bêtesîre ke meeşko bixebitîyo. Pê zextî êyê ke paştî danê partîye û wekîlan tepişnenê, şaredarîyan de qeyûm ca kenê, derheqê îdarekaran de dewayan akenê, kenê ke partîye bikerê bêtesîre.''

Turkî bale ante polîtîkaya îqtîdarî yê vera zîndanan zî ser û vat: ''Têna teber de ney zere de zî zext kenê. Ewro zîndanan de bi des hezeran tepişteyê sîyasîyî estê. Bi des hezeran sîyasetmedarî estê. Êyê ke raşta semedê demokrasîyî têkoşîn kenê zîndanan de yê. Zîndanan de zextê sey 12ê êlule esto. Feydeyê na polîtîka ne kurdan rê ne zî şarê Tirkîya rê esto. Zextî çirey netîce nêdanê.  Êyê ke zext kenê do miheqeq rojêke hesabê kerdişanê xo bidê. Ma nayî hole zanê.''

Ahmet Turkî ard ziwan ke tecrîdê serê Rayberê Şarê Kurdî Abdullah Ocalanî zaf bîyo xorî û vat: ''Xora heme şarî rîyê tecrîd û rejîmê zextî ra qerqilnenê. Hêrişê zîndanan têna vera kurdan ney vera şaranê Tirkîya ke hetê demokrasîyî de yê yeno kerdene. No zext têna zirar kurdan nêdano, zirar dano heme şaranê Tirkîye. Ewro bi seyan endamê çapemenîye, bi seyan pawitoxê demokrasîyî estê. Polîtîkaya tecrîdî dîktatorîye ya. Xeylêk cayanê dinya de rejîmanê wina zordaran hesabê kerdişanê xo dayî. Eke nasname, kultur û bawerîyanê cîyayan rê hurmet nêro ramojnayene Tirkîya do vînî bikero.''