AKP seba ke barbarîya JÎTEMî û barbarîya dezgehanê sey ey ê ke hetê dewlete ra ronîyayê, werte ra wedarno mekanîzmaya muhakemekerdişî sey hacetêkî şuxilneno û prosesanê huqûqîyan werte ra wedarneno.

Na dosya de ma tay mîsalanê qirkerdişanê JÎTEMî ser o vinderê ke nêameyî muhakemekerdene.

Dewleta tirke ya faşîste serranê 90an de seba ke têgêrayîşê azadîye yê şarê kurdî û PKKyî çin bikera Vakurê Kurdîstanî de Rewşa Îstîsnayîye (OHAL) îlan kerde û bi qanûnanê OHALî JÎTEM naro. Heta nika cînayetê ke JÎTEMî kerd nêameyî roşnîkerdene û kiştoxê JÎTEMî nêameyî muhakemekerdene. 

17ê teşrîna verêne ya 1994î de Sadî Tatu (61) dewa Zirkêtî ya qezaya Haskoyî ya Mûşî de wexto ke pa cinîya xo Gulnaze Tatu û merdima xo Kadrîye Tatu şîyêne ware vînî bîyê. Keyeyê Tatuyî seba ke aqîbetê 3 kesan bizanê muracatê Fermandarîya Cendirmeyan a dewe û qerqolî kerd. La bi bahaneya ke herême de operasyon est o, muracatê keyeyî red benê. Roja 10. ya serebûtî de Fermandarê Cendirmeyan ê dewe keyeyî rê vano ke hîrê kesî Koyê Çiringêzî de hetê PKKyî ra kişîyayê la destûr nêdano ke keye cenazayan bigêro. Ahmet Muslum (Tatu) Sadioglu roja 20. ya serebûtî de leşkerîye ra yeno îzîn û aqîbetê keyeyê xo perseno. La Sadioglu yeno destbendkerdene û îşkence vîneno. Fermandarê qereqolî Nurullah tira vano 'Ya dewijê şima benê qoricî yan zî aqîbetê pêroyînan do wina bibo.' Bi nê hawayî Nurullah îtîraf keno ke înan 6 kesî kiştê. Keye reyna zaf cayan rê muracat keno la destveng agêreno. Naye ser o keyeyê Tatuyî koçê Bursa keno. Fermandarîya Pêroyî ya Cendirmeyan û Walîtîya Mûşî îdîa kenê ke keye hetê PKKyî ra ame remnayene. Tewr peyên dewaya serê aqîbetê keyeyê Tatuyî yena berdene bi Mehkemeya Heqanê Merdiman a Ewropa (MHME). La hema zî dewa nêqedîyaye.

12ê çeleyê 1993yî de mezraya Kolgezerî ya dewa Guçluyî ya qezaya Cizîre ya Şirnexî de dadî û 5 domanê Elgunî pê çekan kişîyenê. Domano 8 rojî Murat zî pê dûyê çekan jehr beno û yeno qetilkerdene. A şewe leşkeran û endamanê JÎTEMî eştbi dewe ser û dormeyê keyeyê Davut Elgunî girewtbî. Nezîro 8 serre, Lokmano 21 serre, Hacrra 4 serre, Hidiro 20 serre û dadîya înan Nesîbeya 42 serre pê çekan û dergûş Murat pê dûyî  ameyî qetilkerdene. Veyveyê keyeyê Elgunî Hedîye û Azîze seba ke xo nimna xelisîyenê. Gefan ra keye nêeşkeno dewa abikero. Bi înîsîyatîfê ÎHDyî 210 de vera qetilkerdişî dewa ameye akerdene. Davut Elgunî pare kerd ke qetilkerdişî ra çend rojî dima Serdar Aydino ke Cizîre de karî kerdêne û fermandarêk ameyê keyeyê ci. Înan Elgunî rê vato ke seba ke lajê ey roket eşto panzerê înan, no serebût qewimîyayo. La lajê Elgunî o çax Zîndanê Amedî de tepişte bi. Fermandarî Elgunî rê vat ke leşkeranê înan 'xeletî' ra domanê keyeyî eştê guleyan ver. 

7ê temmuza 1995î de tîmanê taybetan eşt dewa Horselî ya qezaya Dara Hênî ya Amedî ser. Dewijan bi saetan îşkence dî. Leşkeran Hasan Yanan (35) verê çimanê her kesî de girê da û vêşna. Dewij û cinîyan waşt ke mudaxele bikerê la leşkeran guleyî varnayî înan ser. Husnîye Horan û Fahrîye Kiliç birîndar bîyî. Endamanê JÎTEMî dewijan rê gefî wendê ke wa vajê PKKyî no çi kerdo. Dima ke dewijan cenaza defin kerd JÎTEMî reyna eşt dewe ser û pêro banê dewe vêşnayî.

Îzzet Tugal 17ê teşrîna peyêne ya 1995î de Amed de domananê xo yê 10 û 12 serran reyde şi dewa xo ya Licê. Şan 5 kesî pê kincanê gerîlayan ameyî keyeyê înan û keyeyî reyde çay wenê, sohbet kenê. Nê kesî Tugalî rê  birazîyê ci Bahattîn Turfan persenê ke 1991 de beşdarê merasîmê cenazaya Vedat Aydinî bîyo û dima ameyo qetilkerdene. Nê kesî Tugalî benê. O çax babîyê Tugalî vîneno ke 2 pîkapê leşketî û wesayîtê zirxînî, 10 leşkerî teber de yê. Tugalî ra dima xeberêke nêna girewtene. 20ê kanûne de agahîya cenazaya domanê înan şina goşê keyeyê Tugalî. Keye cenaza teşhîs keno û vano ke lajê înan pê îşkenceyî kişîyayo. Leşkerî nêverdenê ke cenaza wa bêra  berdene bi Amed û Licê. Dewlete qetî qebul nêkena ke Tugal ameyo destbendkerdene.