Aktîvîstanê Alamanî ra grubêk qerar da paştdayîş bidê xoverdayîşê grevê vêşanîye yo ke seba  wedaritişê tecrîdkerdişê Rayberê Şarê Kurdî Abdullah Ocalanî bi rayberîya Hemsereka KCD'yî û Parlamentera HDP'yî ya Colemêrgê Leyla Guvene yenê kerdene. Aktîvîstî bi nameyê, “Leyla; ti û têkoşînê to zerrîya ma de yo” ewro ra tepîya dest bi grevê vêşanîye kenê.

Bi nê amancî ewro meydanê Heînrîchplatzî yê qezaya Kreuzbergî ya Berlînî de kombîyayîşêkê çapemenîye do bêro viraştene û grevê vêşanîye dest pêbikero. Grev heta 15'ê Nîsane do dewam bikero. Aktîvîstan serê hesabê medyaya sosyale ra bi nameyê  "@HungerstreikB" eşkerayîye daye û veng da ke her kes paştdatîş bido çalakîya înan.

Aktîvîstan ard vîrî ke dewleta Tirkan Îmraliyî de tecrîdêko giran Ocalanî ser ro domnena û vera tecîrîdî zî Leyla Guvene, 7 hezar girewteyî hepisxaneyan de û xeylî aktîvîstî zî merkezanê Ewropa de grevê vêşanîye de yê û vat, “Ma paştdayîş danê waştişanê seba wedaritişê tecrîdî. Ma do bi xoverdayîşê xo, sansûrê medyaya Almanî yê serê xoverdayoxan werte ra wedarê.”

Eşkerayîye bi nameyê Komîteya Xoverdayîşî ya Berlînî ameye dayene û ame vatene, tecrîd bi têkoşînê hemparî do bêro wedaritene. Hetê bînî ra ama vatene, kesê ke xo şorişger  demokrat vînenê ganî bikewê mîyanê têgêrayîşî. Komîteye da zanayene, meydano ke çalakîye do tede bêra viraştene de, rojanê Şeme û Yewşeme de saetanê 16:00  ra tepîya aktîvîteyê cîyayî bêrê viraştene.