Sîyasetmedara kurde Aysele Tugluka ke nêweşa demansî ya, rixmo ke Dewaya Kobanê de bira veradîyayîşê ci dîyaye zî dosyayêka bîne ra vera nêdîyena. Seba ke Aysele Tugluk bêra veradayene medyaya dîjîtale de kampanya dîyaye destpêkerdene. Kekê aye Alaattîn Tuglukî Zîndanê Kandira de Aysele Tugluk zîyaret kerde û derheqê rewşa ey de ANFyî rê qisey kerd.

Alattîn Tuglukî pare kerd ke verê tedawîya waya ci de ganî hînî astengî nêra ronayene û ard ziwan ke nê zîyaretê peyênî de ey dîyo ke refleksê waya ci zaf bîyê giran. Alaattîn Tuglukî vat: ''Hînî bes o, wa waya mi bêra veradayene ke ma bieşkê aye tedawî bikerê. Xora wextêkê dergî ra nata a tepişte ya.''

Alaattîn Tuglukî vist vîrî ke Dezgehê Tipê Edlîyî seba Serekê Diyînî yê verênî yê Fermandarîya Artêşa Tirke Çevîk Bîrî nêweşîya demansî ra raporê 'nêeşkeno zîndan de bimano' dayo û Çevîk Bîr vera dîyayo. Tuglukî eşkera kerd ke waya ci Aysele Tugluk rê ATKyî heman rapor nê raporê 'eşkena zîndan de bimana' dayo.

Tuglukî vat: ''Se beno wa bibo, kam se keno wa bikero ganî heqê weşîye seba her kesî seyci bibo. Ma wazenê heman nêzdîbîyayîş seba waya mi zî bêro mojnayene. Ganî cîyakerîye nêra kerdene. Mi zî waştêne ke raporê ATKyî raşt bibîyêne û weşîya waya mi hol bibîyêne. La heyf ke wina nîyo.''

Tuglukî da zanayene ke seba taloqê cezaya Aysele Tugluk avûkatî mîyanê xîretan de yê û waşt ke waya ci cade bêra veradayene û bêra tedawîkerdene.