Serekê DYE’yî Trûmpî dewletanê Ewropa ra waştbi ke hemwelatijê xo yê DAÎŞ’îyan ê ke hetê QSD‘yî ra bi weşîye ameyê pêgirewtene, bigîrê. Heta nika Almanya, Îngilîstan û Danîmarka vato “Ma DAÎŞ’îyan nêwazenê”.
Serekê DYE’yî Donald Trûmpî vizêrî Twîtterî ser o yew peyam pare kerdîbi û wina vatbi: “DYE Qralîyetê Yewbîyayeyî, Fransa, Almanya û hemkaranê xo yê bînan ê Ewropa ra wazena ke 800 ra zêde DAÎŞ’î yê ke Surîye de ameyê pêgirewtene, seba ke bivejê mehkeme berê welatanê xo. Alternatîfêko bîn çin o, eke wina nêbo ma do bêçaretîye ra do serbest biverdê ra.“
Mabênê DAÎŞ’îyan ê ke destê YPG/QSD‘yî de yê de xeylî hemwelatijê dewletanê Ewropa estê. La Almanya, Îngilîstan û Danîmarka cewabêko negatîf dayo waştişê Trûmpî.
Wezaretê Karanê Teberî yê Almanya, bi beyanatê nuştekîyî cewab da Trûmpî û va seba ke Surîye de temsîlkarîya xo ya fermîye çin a, nêeşkenê derheqê hemwelatijanê xo yê uca yî de xeberanê zelalan bigîrê. Wezaretîye beyanatê xo de wina va: “Tayê xeberî yenê û vanê,tayê hemwelatijê şima hepisxaneyan de yê. La ma nêeşkenê bi çimeyanê xo yê fermîyan zelal bikê.“
La nê wextanê peyênan de medyaya Almanya de no derheq de xeberî yenê viraştene.
Eksê beyanatê Almanya, Danîmarka derheqê babete de, yew beyanato akerde da. Wezîfedarê Karanê Teberî yê Serekwezîrê Danîmarka Aastrûp Jensenî, bale ante endamanê DAÎŞ’îyan ê Danîmarkayijan ê destê YPG‘yî ser û va, “Nê merdimî dinyaye de merdimê tewr bixof ê. Ma înan nêwazenîme“. Sosyal Demokratê Danîmarka zî eksê ci vanê: “Ê tîya ra şîyê û beşdarê DAÎŞ’î bîyê. Yanê welatê xo ver sûc kerdo, naye ra zî ganî tîya de bêrê muhakemekerdene.“
Îngilîstan de zî eynî munaqeşeyî yenê kerdene. Hemwelatija Îngilîstanî Shamîma Begûme ya ke 15 serrîya xo de remaya û beşdarê çeteyanê DAÎŞ’î bîya, çend rojî verî vatbî ez wazena ke agêra welatê xo. La Wezîrê Karanê Zereyî Sajîd Javîdî naye ser va ma Begûme û DAÎŞ’îyanê bînan nêwazenîme.
Wezîrê Îngilîzî çend rojî naye ra ver beyanatêk da û va: “Eke to paştdarîye daya rêxistinê terorîstî yê teberê welatî, o wext astengîya vera agêrayîşê to, mi rê qisawete nîya.“ La Wezîrê Edaletî yê Îngilîstanî Davîd Gaûkeyî va verê agêrayîşê hemwelatijan astengkerdiş hiqûqî nîyo û wina dewam kerd: “Nêbeno ke ma hemwelatijanê xo bê dewlete biverdîme, o wext problemê qanûnîyî vejînê meydan.“
TENA 5 DEWLETAN HEMWELATIJÊ XO WAŞTÎ
Fransa, Endonezya, Rûsya, Fas û Sûdanî, îdareyê Rojawanî ra, bi hewayêkê fermîyî, hemwelatijê xo yê ke beşdarê DAÎŞ’î bîyê û destê YPG‘yî de yê waştî.
Heta nika YPG‘yî operasyonan de 2700 çeteyê DAÎŞ’î, bi weşîye pêgirewtê û nê çeteyî nika hepisxaneyanê Rojawanî de yenê girewtene. Nê çeteyan ra 880’ê xo hemwelatijê 46 dewletanê cîya-cîyayan ê û zêdeyêrê xo zî Ewropa ra ameyê.
