Almanya de tedaya vera kurdan do bêra şermezarkerdene

KON-MED û FCK-BW-BAYERNî tepişîyayîşê kurdîstanijanê Almanya şermezar kerd û seba beşdarîya çalakîyanê protestoyî yê Stuttgart û Heilbronnî veng da.

Konfederasyonê Komelanê Kurdîstanijan ê Almanya (KON-MED) û Federasyonê Komelanê Kurdîstanijan (FCK-BW-BAYERN) bi eşkerayîyêke venga hukmatê Almanya da ke aktîvîstanê kurdan ê tepişteyan vera bido.

Eşkerayîye de bale ameye antene sereştişanê Keyeyê Kurdan ê Medya, NCDK û Komeleya Kulturê Kurdan ê Nurnbergî ser o û wina ame vatene: ''7ê gulane de Nurnberg de polîsanê almanan sereştiş de Makbule K., meymanê aye Mîrza B. destbend kerdî û tepiştî. Wextê sereştişî de tedaya polîsan ra Makbule K. nêweş bîye û wedarîyaye nêweşxane, rewşa aye giran a. 11ê gulane de zî polîsan Heilbronn û Esslingen de sey tewirê polîsanê tirkan Mazlûm D. û Abdullah O. destbend kerdî. Tewirê înan nêno qebulkerdene. Hukmatê Almanya seba menfaatanê xo wazeno kurdan qir bikero.Wa Almanya nê polîtîkayanê zordestan war verde. Karo tewr raşt ê Almanya seba meseleya kurdan înîsîyatîf girewtiş o. Ma venga pêro kurdîstanijan danê ke ewro Stuttgart û Heilnbronn de tewrê çalakîyanê şermezarkerdişî bibê.''

Bernameyê çalakîyan wina yo:

Stuttgart, Schlossplatz (Meydanê Kobanê), Saete: 17:00

Heilbronn, Kiliansplatz, Saete: 17:00