Çalakîya grevê vêşanîye yê bêdem-bêagêrayîşî ke rayberîya hemsereka KCDyî û parlamentera HDPyî Leyla Guvene de seba wedartişê tecrîdê serê Rayberê Şarê Kurdî Abdullah Ocalanî ameye destpêkerdene û xeylê cayanê dinya  de yena domnanyene, kesêko bîn zî tewrê ci bi.

Bajarê Nurngbergî yê Almanya de Kurdistanijo bi nameyê Şîyar Xelîlî Banê Şarî yê Medya de dest bi grevê vêşanîye yê bêdem-bêagêrayîşî kerd. Xelîlî bi eşkerayîyêk derheqê çalakîya xo de nê vatî: ‘‘Bi komploya mîyanneteweyîye Rayberîya ma ame berdene bi Îmrali û bi serran o binê tecrîdê giranî de yo û heme dinya vera naye bêveng a. Hetêk ra Rayberîya ma ser o tecrîd yeno bicaardene, hetêk ra zî xeylî cayanê Kurdistanî de qirkerdişî ameyî kerdene. La dinya vera qirkerdişan de zî çimê xo girewtî. Eke Rayberîya ma ser o tecrîd nêameyêne bicaardene, nê qirkerdişî zî nêbîyêne. Ganî tecrîd cade bêro wedartene. Ez seba grevî kewta erey û seba naye xo krîtîk kena. La ez sey yew ciwanê Kurdî nê tecrîdî qebûl nêkena û do mucadeleyê mi heta peynî dewam bikero. Cuyayîş xoverdayîş o.‘‘