Almanya wazena multecîyê ke red kerdê bierzo zîndanan!

Wezîrê karê zereyî yo muhafezekar ê Almanya Horst Seehoferî vat ganî multecîyê ke waştişê înan ê îltîca ameyo redkerdene heta sînor ra bêrê vetene zîndanan de bêrê tepiştene.

Nê wextanê peyênan de bi hawayêkê balkêşî sazîyanê medya yê namdaran ê Almanya xeberê ke vatêne nisbetê sûcî mîyanê ê kesanê ke waştişê înan ê îltîca ameyê redkerdene vêşî yo weşanayêne. Bi eşkerayîya peyêna ya wezîrê karê zereyî Horst Seehoferî sebebê vêşîbîyayîşê nê xeberan bewlî bi. Meger wezaretê karê zereyî wextêk o ke derheqê ê kesanê ke waştişê înan ê îltîca ameyê redkerdene de projeyêkê qanûnî yê neweyî hadre keno. Seba nê zî bi rayîrê medya zemînê nê projeyî amade keno.

Seehofero ke rojnameyê “Passauer Neuen Presse”yî rê qisey kerd vat: “Kesê ke derheqê înan de qerarê tebervetişê sînorî dîyayo seba ke wextê xo de bêrê vetene teberê sînorî ganî ma înan zîndan de bitepişê. Hemverê îhtîmalê remayîşê înan de ma dest de tenya zîndan de tepiştişê înan esto.”  

SERÊ MENGA ÇILE DE QANÛN YENO HADREKERDENE

Seehoferî vat ê do serê menga Çile de projeyî pêşkêşê hukmatê koalîsyonî yo ke Xirîstîyan Demokratan û Sosyal Demokratan ra yeno ra bikerê û wina vat: “Êyê ke îhtîyacîya înan bi îltîca esta do înan rê paştî bêro dayene, la êyê ke çinya ganî bi hawayêkê tewr pêtî welatî ca verdê.” Seehoferî bi nê vatişî qanûno newe îzah kerd.    

 ‘DERDO TEKANE’ YÊ SEEHOFERÎ MULTECÎ YÊ!

Seehofero ke wextêko derg serekwezîrîya Eyaletê Bavyera kerde, hukmatê Merekele ke menga Adare ya ravêrtî de dest bi gure kerdibi bi wezîrê karê zereyî. No wextêk o ke bi hawayêkê biisrarî vano ganî berê welatî ro multecîyan bêrê panayene û multecîyê ke welat de qeydê înan esto zî bi hawayêkê pêtî bêrê vetene bi teberê sînorî.