Serkêşîya DBP, MED-DER û DEM Partî de Amed de bi wesîleya Roja Ziwanê Dayîke ya Dinya rayraşîyayîşêk ame kerdene. Rayraşîyayîş de sloganê sey ''Bê ziwan cuye nêbena'', ''Ziwanê ma rûmetê ma yo'' ameyî vatene.

Hemsereka Pêroyî ya DBPyî Çîgdeme Kiliçgun Uçar zî tede xeylêk kesî tewrê rayraşîyayîşî bîyî. Dima girseyî verê Peykerê Heqanê Merdiman de eşkerayîye daye. Hemvervatoxa Komîsyonê Ziwan û Kulturî ya DEM Partî Demîle Turhalli Balsak eşkerayîye wende. Eşkerayîye de waştişê serê kurdkî wina ameyî rêzkerdene:

''-Ganî ziwanê kurdkî  bi qanûnan bibo wayîrê statuyêkê resmîyî.

-Wa ziwanê kurdkî bibo ziwanê perwerdeyî.

-Wa Tirkîya astengîya vera madeyanê 17i 29 û 30. yê Peymana Heqanê Domanan wedarna û erkanê xo goreyê peymane bîyara ca.

-Enstîtuyê Ziwanê Kurdkî wa bibo resmî û hetê temsîlkaranê kurdan ra bêro îdarekerdene.

-Wa pêro nameyê kurdkî yê cografyaya kurdan kurdkî bibê.

-Wa pêro rêxistini partî, dezgeh û dormeyê kurdî dormeyê ziwanê dayîke de kom bibê û seba ziwanê ma têkoşîn bikerê.''