Komeleya Heqanê Merdiman (ÎHD), Weqfa Heqanê Merdiman a Tirkîya (TÎHV),  Baroya Amedî, Odaya Tabîban a Amedî (DTO) û Înîsîyatîfê HAKî  banê îHDyî yê Amedî derheqê grevê vêşanîye yê tepişteyan ke vera tecrîdê serê Rayberê Şarê Kurdî Abdullah Ocalanî yeno kerdene de eşkerayîya çapemenîye daye.

Eşkerayîye de Hemserekê ÎHDyî yê Amedî Abdullah Zeytunî qisey kerd. Zeytunî vist vîrî ke grevê vêşanîye di mengî xo dima verdayî  û vat: ''Rîyê sîstemê otorîterî û hukmo ke bi destê îqtîdarî têgêreno hûmara tepişteyan zêdîyena. Rixmo ke serra 2020î de bi qanûnê înfazî ke sîyasîyan tira îstîfade nêkerd, bi hezaran tepişteyî ameyî veradayene hema serrêke  denêbîya hûmara tepişteyan hema hema sey verîya. Badê qanûnê înfazî zîndanan de binpaykerdişê heqan zêdîyayî. Vera caardişanê keyfîyan ê ke heme heqanê tepişteyan binpay kenê grevê vêşanîye dîya destpêkerdene. Seba ke ma çalakîyanê verênan ra zî zanê na çalakîya de rîskê girdî estî, ma qerqilîyenê.

Zeytunî ard ziwan ke ganî tecrîd û binpaykerdişê heqanê merdiman cade biqedîyê û vat: Ma dezgehê  ke binê na eşkerayîye de morê ma esto, ma veng danê  Wezîrîya Edaletî û dezgehanê eleqedaran wa  wezîfeyê xo bîyarî ca ke netîceyê xirabî merê ciwîyayene. Ganî vera tecrîd, caardişanê înfazanê bêadîlan û binpaykerdişê heqan cade game bêrê eştene ke tepişteyî heqanê xo yê huqûqîyan bişuxulnê. Eke waştişê tepişteyan merê ca netîceya ci bena girane Reyna ma veng danê tepişteyan zî û înan ra wazenê ke wa grevî biqedînê.''