Kuluba Xebatanê Sportîf a Amedî, derheqê qerarê Heyetê Disîplînî yê Futbola Profesyonele (PDFK) ya Federasyona Futbole ya Tirkîya (TFF) yo ke seba kaptanê Amedsporî Mansûr Çalarî de dayo, ke heta merdiş o do nêeşkewo futbole kay bikero, Tesîsanê Talaytepe de eşkerayîyêka çapemenîye daye.

SEREBÛTÊ SEYYEWBÎNAN, CEZAYÊ CÎYAYÎ

Sekreterê Pêroyî yê Kuluba Amedsporî Bulten Oguzî derheqê cezaya Çalarî de bale ante serê serebûtanê seyyewbînan û cezayanê cîyayan û vat, destê kaybazan de çîyêkê birnayîşî û qulekerdişî çin bîyî, la bi vatişanê kaybazanê Sakaryasporî  yê ame ‘jîletkerdene’ qerar ameyo dayene ke heta merdiş kaybazîye ra bêro qedexekerdene.

QERAR HUQÛQÎ NÊ SÎYASÎ YO

Serekê Amedsporî Alî Karakaşî vat, qerar sebebanê sîyasî ra ameyo dayene û vat, “Sîyasetê xo nîyarê mabênê sporî nêkerê. Futbol û sîyaset pîya nêbenê. Qerarê PFDK'yî bê het û bi edalet nîyo. Zaf zelal o ke rîyê talîmatan ra ameyo girewtene. Seba ke PFDK nê qerarî apey bigêro hewteyêk esto. Ma hêvî kenê ke hayrê nê qerarê şaşî yo ke daye benê û nê qerarî ra dest ancenê. Hetê bînî ra seba ke ma îtîraz bikerê wextêk esto. Eke PFDK nê qerarî ra fek ranêverdo ma do qerarî biberê dadgehî.”

HÊRIŞ VERA HEME AMEDÎ YO

Serekê Amedsporî Azîz Elaldî zî vat, vera Amedsporî kampanyaya lîncî ameya destpêkerdene. A Spor vera Amedsporî kampanyaya lîncî de mîsyonêk girewto û vat, “No hêriş tena vera Amedsporî nîyo, verê heme Amedî yo.”