Goreyê xebera Rojnewsî hêrişê dewleta tirke ya îşxalkere yê vera Başûrê Kurdîstanî dewam kenê. 

15ê hezîrane de artêşa îşxalkere bi hezaran leşkerî, 300 tank û wesayîtê zirxinî sînorê Diholî de cakerdî. Hêrişanê dewleta tirke ya îşxalkere ra Dihok de 184 keyeyî wareyê xo ra bîyî. 

Goreyê Rojnewsî dewleta îşxalkere Başûr de di menganê peyênan de 19 banî, 2 dibistanî, kargehêk, otomobîlêk, dêrêk û 2 projeyê awa werdişî dayî bombayan ver.

Heta nika Başûr de 170 dewî hetê dewleta tirke ra ameyî xalîkerdene û 902 dewî binê tehlukeyê xalîkerdişî de yê.

Artêşa îşxalkere Behdînan de 9 baregehê neweyî awan kerdî. 2015 ra nata bi temamî 74 baregehê artêşa tirke Başûr de ameyî awankerdene.

Hêrişanê artêşa îşxalkere ra xetê îrtîbatî yê 110 dewan binê tesîrê xirabî de mendî. Ancî hêrişan ra 68 hezar donim erazîyî zî vêşayî.

Goreyê doneyanê Rojnewsî dewleta îşxalkere nê wextanê peyênan de Başûr 300 reyî da bombayan ver. Nê hêrişan de 13 hemwelatîyê sivîlî şehîd bîyî û 11 hemwelatîyî zî birîndar bîyî. Par zî hêrişanê dewleta tirke de 33 hemwelatîyî şehîd bibî û 22 sivîlî birîndar bibî.

Rixmê hendê kerdişanê dewleta tirke zî hukmatê Herêma Kurdîstanî nêrazîbîyayîşê xo nêmojneno û heta eqsê ci hêrişanê îşxalî meşrû keno.