Akademîsyen û Sosyolog Harun Ercano ke Zanîngehê Eyaletî yê New Yorkî de doktora keno, derheqê asayîşê weçînayîşan de ANFyî rê qisey kerd.

Ercanî bale ante ser ke warê weçînayîşî de mabênê îqtîdar û muxalefetî de reqabetêko neheq est o û no çi tewr zaf Vakurê Kurdîstanî de yeno hîskerdene. Harun Ercanî pare kerd ke weçînayîşanê 14ê gulane de CHP nêeşka wayîrê sindoqan vejîya. Ercanî vat: ''Bêşik weçînayîşanê 14ê gulane de bêusûlîye ameya kerdene. Mîsal herêmanê erdlerzî de se ra 80ê merdiman raye daya. La no mumkîn nîyo. Reyna xeylêk rayê Partîya Çep a Keske MHPyî rê nusîyayê. Tîya de ganî şar pê îqna bibo ke weçînayîşî bi hawayêkê meşrûyî nêqewimîyayê. Eke şar pê îqna bibo ke CHP wayîrê sindoqan nêvejîyeno do nêşoro sindoqan ser. O çax zî Erdogan do ser bikewo. Muxalefet seba ke turo diyîn est o zaf serê asayîşê weçînayîşanê 14ê gulane de nêvindert. 

La çîyo winayên zî est o; goreyê nê netîceyanê bişikan nîjadperestê sey Sînan Oganî weçînayîşan de ser kewtê. Nika Kiliçdaroglu goreyê nê netîceyan xo nêzdîyê nîjadperestan keno, qiseyanê nîjadperestan keno la kurdan şikneno. Beno ke turê diyînî de kurdî zî nêşorê sindoqan ser.''

Harun Ercanî da zanayene ke weçînayîşanê 14ê gulane de reyna tewr zaf Vakurê Kurdîstanî de bêusulîyî qewimîyayê û tedaya îqtîdarî ameya hîskerdene. Ercanî vat: ''Seke zanîyeno weçînayîşan ra ver xeylêk operasyonê destbendkerdiş û tepiştişî qewimîyayî û Vakur de xeylêk kesî tepişîyabî. Reyna şewa weçînayîşan de Cizîre, Slopîya, Nisêbîn de polîsan şar provake kerd. Îqtîdar nêeşkeno Anqara, Îzmîr yan zî Îstanbul de çîyê winayênî bikero. Çunke o çax her kes meşrûtîya weçînayîşan ser o şik keno. Îqtîdar seba ke çimê her kesî bitersno û nêrazîbîyayîşanê serê netîceyan asteng bikero pê kurdan mesaj da her kesî. Yanî beno ke çîyê ke şaristananê kurdan de qewimîyayê seba pêro komelî yew mesaj bi. ''