Namzedanê Partîya Çep a Keske yê Mêrdînî ra George Aslanî derheqê weçînayîşanê 14ê gulane de ANFyî rê qisey kerd.

George Aslano ke sûryanî yo pare kerd ke sûryanîyan tedaya dewleta tirke ra koçê teberê welatî kerdbî la tim eleqe mojna meseleyanê welatî. Aslanî ard ziwan ke sûryanî qetî nêbîyê hemwelatîyê têdûştî.

Aslanî vat: ''Surgun de zaf embazê ma est ê. Seba ke ma suryanî yê, xirîstîyan ê zaf ant. Ez do têkoşîn bikera ke embazê ma yê surgunkerdeyî bieşkê abigêrê. Mesleyê sûryanîyan zaf ê. Nînan ra yew zî no yo ke dewlete dest nayo erd û malanê ma ser. Eke ez bêra weçînayene do nê meseleyan ser de vindera.''

Aslanî îfade kerd ke îqtîdarê AKP-MHPyî do 14ê gulane de şoro û vat: ''Rayê kurdan raşta zî sey kilîd ê. Rayanê kurdan ra nêbo çîyêk nêvurîyeno. Ê zî ney zanenê. Coka îqtîdaro newe wa kurdan çin nêhesibno û kurdan reyde têbigêro. Naye ra ber yew rayîrê çareserîye çin o.''

Aslanî peynîya qiseykerdişê xo de no mesaj da: ''Eke ez bêra weçînayene do biba vengê şarê kurdî, vengê armenî û sûryanîyan. Ez soz dana ke kam ke bindest o ez do bibo vengê ci.''