Cinîye E.D.ya ke se ra 50 astengdara mezgî ya, Serekê Komeleya Vilakerdişê Îlmî yê Uzletî Alperen Sadeyî tecawuzê ci kerd. Derheqê serebûtî de Mehkemeya Cezaya Girane ya Anadoluyî ya Îstanbulî de dewa ameye akerdene.

Goreyê xebera Halk TVyî serebût 7ê adare de qewimîya. A roje E.D. wexto ke dibistane ra rew vejîyaye hetê Sadeyo ke bi nameyê ''Xoce Efendî Alî Riza Sade'' zanîyeno, a remnaye û bê rizaya E.D. keyeyê xo de ci rê 'mareyê dînî' kerd. Alperen Sadeyî keyeyê xo yê Çekmekoyî de bi hawayêkê sîstematîkî tecawuzê E.D. kerd û dima E.D. cayêk de verdaye. 

E.D. dima ke hetê keyeyê xo ra ameye dîyene, qala serebûtî waya xo rê kerde. Cigêrayîşan ra dima eşkera bi ke Alperen Sadeyî a remnaya. Sade hetê mehkeme ra tepişîya.

E.D. serebûtî ra 15 rojan dima 23yê adare de apartmanê keyeyê înan ra, qata çarine ra xo eşt war û dinyaya xo bedilnaye.

Derheqê tecawuzker Sadeyî de hetê Serdozgerîya Komare ya Anadoluyî ra îdîaname ame akerdene. Îdîaname de yeno waştene ke cezaya zîndanî ya 3 serran ra heta 26,5 serran bêra dayene Sadeyî.

Komeleya Vilakerdişê Îlmî yê Uzletî 2020 de ronîyaye û xebatê ci hema zî dewam kenê. Komele nika zî 'perwerde' dana zaf domanan. Na komele girêdayeyê Îsmaîlagayî ya û seba cemaetê Mahmut Ustaosmanogluyî bernameyanê wendişê Quranî serûber kena.