Endama Partîya Çepe ya Meclîsê Eyaletê Hamburgî Cansu Ozdemîr zî tede 27 kesî roja şemeyî wexto ke şîyêne Hewlêr hetê polîsanê almanan ra Dusseldorf de ameybî astengkerdene. Partîya Çepe babete viste rojdemê Meclîsê Federalî.

Vernîyazê persî hetê Wekîlê Partîya Çepe Gokay Akbulutî ra ame amadekerdene. Vernîyaz de Angela Merkel ra no pers ame perskerdene: ''Şima astengkerdişê Heyetê Haştîye senî ercnenê? Bira astengkerdişî hetê Tirkîya ra dîyaya yan?'' Vernîyaz de vêşnayîşê daristanan û vengkerdişê dewanê Başûrê Kurdîstanî zî ameyî vîrvistene.

Akbulutî derheqê babete de ANFyî rê qisey kerd û astengkerdişê heyetî bi xurtî rexne kerd. Akbulutî vat: ''Almanya goreyê menfaatanê Tirkîya têgêrena.''
Hemsereka Partîya Çepe Susanne Hennig zî Wezîrê Karanê Zereyî û Karanê Teberî rexne kerdî. Hennige îfade kerd ke astengkerdişê heqê seyahetî yê Cansu Ozdemîre nêno qebulkerdene û ê do na babete teqîb bikerê.