Grevê vêşanîye yê hemsereka KCDyî û parlamentera HDPyî ya Colemêrgî Leyla Guvene yê hemverê tecrîdî kewt roja xo ya 35ine. Avûkatanê Guvene rojanê ravêrteyan de derheqê halê xirabîyayîşê weşîya Guvene de kombîyayîşêkê çapemenîye organîze kerdibi. Avûkatê Guvene Şîvan Cemîl Ozenî ANFyî rê qisey kerd û vat ke girewtişê vîtamînê Byî yê Guvene yeno astengkerdene.  

'5 ROJÎ YÊ KE KEWTA MERHELEYA KRÎTÎKE'

Avûkat Ozenî vat ke roja 30ine ra dima çalakîya Guvene kewta merheleyêka krîtîke û nê vatî: "Goreyê raporê Yewîya Tabîbanê Tirkîye ra na çalakîye de roja 14ine û roja 30ine krîtîk ê. Seba na merheleya krîtîke ma do heme sazîyanê weşîye ke dawet bikerê.

Çunke ma wazenê ke hetê heyetanê xoseran ra parlamentera ma kontrolanê weşîye ra bêro ravêrtene. Îdareyê zîndanî nêverdano ke aye rê vîtamînê B1î bêro dayene. Rixmê hema teşebusanê ma de zî hewna vîtamînê B1î nêdîyeno parlamentera ma."

'NÊEŞKENA ÎLACANÊ SEBA TEDAWÎYA TUMORÎ BIXEBETNO'

Avûkat Ozenî ard vîrî ke heta wextêkê nizdî bi qanûnan dayîş-girewtişê îlacanê vîtamînê B1î qedexe bi, la wextêkê nizdî de no qedexe wedarîya û nê vatî: "Ma îdareyî ra waşt ke vîtamînê B1î bêro dayene, la heta nika xebera dayîşê B1î bi Guvene nêresaya ma het. Ma wazenê ke sazîyê heqanê merdiman ê mîyanneteweyî hîna aktîf nê prosesî tewîb bikerê."

Ozenî qiseykerdişê xo rê wina dewam kerd: "Tepişîyayîşê aye yê verênî de mezgê Guvene de nêweşîya tumorî vejîyabî. Ancax bi îlacan vernîya nê tumorî eşkena bêro girewtene. Dimayê destpêkerdişê grevî ra hendî nêeşkena nê îlacan zî bigîro. Roja 30ine ra dima parlamentera ma xeylî bîye zihîfe. Xo zaf rincan hîs kena û hemverê venganê dormeyî de zaf bîya hesase. Sebebê nînan zî nêdîyayîşê vîtamînê B1î yo."

Ozenî veng da sazîyanê rayapêroye û vat: "Waştişê parlamentera ma waştişê sîstemê cimatê demokratîkî yê. Tecrîdê serê birêz Abdullah Ocalanî seke parlamentera ma zî vana tecrîdêko giran o. Rejimê Înfazê Ceza her kesî rê seypê yeno bicaardene û ganî adil bo. Çi heyf ke sîstemê înfazî yê Îmraliyî hemverê Rejimê Înfazê Ceza de yo."

DOSYA DO BÊRO EŞRAWITENE BI MHME

Ozenî derheqê cuya rojaneye ya Guvene de zî nê vatî: "Verê birêze Guvene de di kesî û koxuşa bîne de zî di kesî zî grevê vêşanîye de yê. Xora aye bi xo hendî zaf nêeşkena biwano. Embazê ke dormeyê ci de yê eleqedar benê. Halê çimanê aye zî ver bi xirabî şino. Birêz Enîs Berberlîoglu rixmo ke ceza werdebî zî serbest ame veradayene, la Guvene nêamî veradayene. Nika parlamentera tek a ke tepişte ya. Ma nê halî kirişto Mehkemeya Qanûnê Bingeyênî (AYM). Eke AYMyî ra qerarêko negatîf bêro ma do dosya berê Mehkemeya Heqanê Merdiman a Ewropa."