Avûkat Şîvan Cemîl Ozenî vat dewlete çende ewnîyayîşê xo yê meseleyê Kurdan vurnena nê vurnayîşê xo Îmrali de zî ramojnena, hetê polîtîkî ra wazena ke Ocalanî ra qesas bigîro.

Avûkat Şîvan Cemîl Ozenî vat sîstemê Îmrali de keyfîyîyêk ke huqûqî dir têkilîya ci çinya esta, dewlete bi xo goreyê huqûqî tê nêgêrena. Ozenî vat Îmrali de rjimêk ke seba yew şexsî yeno bicaardene dewre de yo û nê vatî:  “Tecrîd îzolasyon o, qedînayîş o, bêîmkan verdayîş o. No hal bi huqûq nêno îzahkerdene. No halê tecrîdî sûcêkê merdimîye yo. Birêz Ocalanî seba aşitî cehd da. Naye ra ma nê halî tenya sey tecrîd zî nêeşkenê name bikerê. No hal ewnîyayîşê meseleyê Kurdan o.”

Avûkat Ozenî tewirê CPTyî hemverê tecrîdî rê zî reaksîyon ramot û vat ke sazîyêk ke raporê xo eşkera nêkero hetê ci yê bawerî û bêhetîya ci bimunaqeşe yo. Ozenî vat: “Netîceyê lobîyanê hêzanê mîyanneteweyîyan de CPT raştîyan nimneno nêvano. Bêvengîya CPT bena sebeb ke nika bi seyan zîndanan de merdimî kewenê grevê vêşanîye yê bêdem-bêagêrayîşî. Mîyanê nê kesan de muwekîlê mi zî estê.”

LEYLA GUVENE ÇALAKÎYA XO DE BIQERAR A

Ozenî vat waştişê wedartişê tecrîdî waştişêko meşru yo û wina domna: “Heta waştişê Leyla Guvene nêro bicaardene a do fek çalakîya xo ra vera nêdo. 12 kîlo kerde vîndî. La Leyla Guvene problemanê weşîya xo nêana ziwan, çare wazena û wazena ke tecrîd bêro wedartene. Ganî no waştişê aye tavilî bêro qebûlkerdene. Dewletêka huqûqî ya demokratîke nê waştişê meşruyî bica ana.”

DEWLETE GOREYÊ QAYDEYANÊ XO TÊ NÊGÊRENA

Peynîya qiseykerdişê xo de Avûkat Şîvan Cemîl Ozenî nê vatî: “Çende ewnîyayîşê dewlete yê meseleyê Kurdan vurîya sîstemê Îmrali zî hende vurîya. No ewnîyayîşêko polîtîk o ke huqûqî nêyo. Ganî dewlete girêdayeyê huqûqî bimano. Na yewe ra ganî dewlete rejimê qesasî yê Îmraliyî ra fek vera bido. Qaydeyanê ke dewlete bi xo ronayê ganî goreyê înan tê bigêro.”