Tirkîya de hêrişê nîjadperestî yê vera kurdan bêmabên dewam kenê. Çend rojî verî Mersîn de hêrişê keyeyêkê hewlêrijî kerd û keye nêweşxane de tedawî bi. Dozger û asayîşî rêxistinanê komelê sivîlî rê pare kerdbi ke na mesele edlî ya û hewce nêkeno ke zemînêkê polîtîkî de bêra ercnayene. Wexto ke kurdî seba xebate şinê Dengizê Sîya, Anatolia Mîyanêne û Marmara maruzê nê hêrişan benê.

Endamê Komîsyonê Vera Nîjdperestî û Cîyakerîye yê ÎHDyî Avûkat Hasan Yalçinî derheqê hêrişanê nîjadperestan de qisey kerd.

Avûkat Yalçinî eşkera kerd ke hêrişê mersînî de hêrişo verên nêbi û verî Sakarya, Trabzon û Anqara de hêrişê winasênî ameyî kerdene.

Yalçinî vat: ''Kesê ke nê hêrişî kerdî misilman yan zî tirk nîyê. Ronayîşê Komara Tirkîya ra nata nê hêrişî yenê kerdene. Tirkîya de pêro merdimî sey tirk qebul benê, nasname û heqê şar û neteweyanê bînan nênê qebulkerdene. Nê hêrişî hêzê xo mewzuatî ra gênê. Ziwanê sîyasetmedar û îqtîdarî zî verê nê hêrişan akeno.''

Yalçinî îfade kerd ke selahîyetdarê dewlete û wezaretê ci hêrişê nîjadperestî sey serebûtanê sîyasîyan nê sey serebûtanê edlîyan vînenê û vat: ''Nê hêrişan ser o tehqîqato xurt nêno kerdene û sey serebûtê edlî yeno ercnayene. Wina bo zî sîyasetmedarî înan pawenê. Mehkeme zî kiştoxan vera dana û serebûtî mîyan kena. Nê warî de mesuldarîya sîyasetmedaran zî esta. Çunke wexto ke ziwanê înan nîjadperest bo kuçeyan de hêrişê nîjadperestî yenê kerdene.''

Yalçinî ard ziwan ke komîsyonê înan hêrişan teqîb keno û vat: ''Ma bi mexdûranê hêrişan têkilîye virazenê, raporan amade kenê û vila kenê. Safhaya diyîne de ma tewrê prosesê tehqîqat û mehkeme benê. Seba ke hêrişkarî bêrê muhakemekerdene ma paştî danê. Nîjadperestîye nêweşîye nîya parçeyêkê sîstemî yo.  Eke gamêke nêra eştene nê hêrişî do bizêdîyê.''