Serekê Şaxê Amedî yê Komeleya Heqanê Merdiman (ÎHD) avukat Abdullah Zeytûnî derheqê tecrîdî û grevanê vêşanîye de ANF’yî rê qisey kerd.

Zeytûnî ard ziwan, înan Amed de koordînasyonêk awan kerdo ke Baro, Weqfê Heqanê Merdiman a Tirkîya, Komeleya Huqûqnasan a seba Azadîye, Odaya Tabîban û ÎHD’yî ra yeno pê.

Ê ard ziwan ke koordinasyon bi hawayêkê binîzamî şino serdana tepişteyanê ke zîndananê Tîpê E, T û D yê Amedî û Zîndanê Xarpêtî û halê weşîye yê tepişteyan yê ke grevê vêşanîye de yê şopneno.

Zeytûnî bale ante ke waştişê çalakwanan qetî meşrû û heqdar ê û goreyê qanûnanê Tirkîya yê. Zeytûnî vat, “La hewna zî bêvengîyêk esta. Rasta ci, Tirkîya wextêko derg o ke zereyê krîzêkê huqûqîyî de ya. No yew xo Zîndanê Îmraliyî yê bi Asayîşê Berzî de ramojneno.”

Seba halkerdişê nê problemi ma sazîyanê eleqedaran dir pêvînayîşî kerdî, la çi heyf ke heta nika tu netîce nêgîrîya. Ma, sey têgêrayîşêkê heqanê merdiman çarçewaya huqûqî de nizdîyê na babete benê. Çunke waştişê ke ê anê ziwan qanûnî û meşrû yê.”

‘Ganî Waştişî Çarçewayêka Qanûnîye De Bêrê Ercnayene’

Zeytûnî ard ziwan, keye û avûkatê Ocalanî û 3 tepişteyê ke Îmrali de manenê her hewte waştişê înan ê pêvînayîşî yeno redkerdene. Labelê Wezaretê Edaletî tim bi mazeretanê nêeşkerayan û tebere huqûqî de muracatan red keno.

Zeytûnî vat, “Selahîyetdarî wazenê waştişê çalakwanan tena hetê polîtîkî ra bêrê ercnayene. Labelê nizdbîyayîşêk obi nê hawayî nêno qebûlkerdene. Nêeşkenê tebere çarçewaya qanûnîye de biercnê. Qanûnê Tedbîrê Ewlekarî û Ceza bi hawayêkê xeylî eşkerayî eşkera keno ke tepişteyêk senî eşkeno keye û avûkatê xo dir pêvînayîş bikero.”

‘Beno Ke Xeberê Nêweşî Zîndanan Ra Bêrê’

Zeytûnî da zanayene o Zîndanê Amedî yê Tîpê D’yî de çalakwanan dir ronişto û vat, “Halê înan ê weşîye hendî dereceya krîtîke ra ravêrto. Eke na bêhuqûqîye dewam bikero beno ke ma xeberanê nêweşan zîndanan ra bigêrê. Bi nameyê ÎHD’yî ma destpêk ra heta nika da zanayene ke ma grevanê vêşanîye yê ke zirar danê bedenî û heqê cuye yê merdiman pêşnîyar nêkenê.

Labelê bêhuqûqîya ke yena kerdene û halo xetimnaye eşkera yo ke bîyê sebeb ke ê muracatê çalakîyêka winayêne bikerê. Naye ra ma na çalakîya înan rê hurmet ramojnenê û çarçewaya azadîya fikir û îfadeyî de ercnenê. Ma wazenê ke waştişê înan çarçewaya qanûnîye de bêrê ercnayene. Ma wazenê  vajê, waştişê înan waştişê ke nêrê qebûlkerdene nêyê.”

‘Selahîyetdarî Tena Goşdarî Kenê’

Zeytûnî derheqê pêvînayîşêk ke vere nikayî bi selahîyetdaranê wezaretî dir viraştibi de hayîdarîyî dayî û vat, “Tena ma nê, organîzasyonê bînî yê heqanê merdiman zî wazenê ke selahîyetdaran dir bêrê têhet. Pêvînayîşê ma yê wezaretî de çîyê ke ma vatî înan tena not girewtî. Derheqê tecrîdî û çalakîyanê grevê vêşanîye de çîyêk nêvatî.”

Zeytûnî bale ante ser ke problem tena tecrîdkerdişê Ocalanî nêyo û vat, “Kam beno wa bibo, tecrîdêko bi no hawa ganî bibo meseleya her kesanê ke heq û huqûqî ser o vindenê. Ma wazenê vajê ke no problem zî eşkeno çarçewaya huqûqîye de bêro halkerdene û ganî ê goreyê peymeyan nizdê na mesela bibê. Naye ra ganî cimato sivîl zî derheqê babete de tewirê xo ramojno. Ganî organîzasyonê heqanê merdiman û huqûqî bi vengêkê berzî halê heqdarî bîyarê ziwan.”

‘Çalakîyê Ma Do Dewam Bikerê’

Serêkê ÎHD’yî yê Amedî Zeytûnî vat, “Eke ma qalê pêameyîşê cimatî û edaletî kenê, ganî m ana babeta ra dest pê bikerê. ÎHD’yî çalakîya ‘Bibe vengê cuye’ viraşte. Amacê ma nê çîyî ra o bi ke vernîya netîceyêkê ke do bibo sebebê travmaya cimatkîye bigêrê. Na yewe ra ganî tavilî îmkanî bêrê afernayene ke Birêz Ocalan û 3 tepişteyê bînî bieşkê keye û avûkatanê xo dir pêvînayîş virazê.”

Zeytûnî peynî de da zanayene ke teşebusê înan ê derheqê babete de do dewam bikerê.