Avûkatanê Buroyê Huqûqî yê Asrinî seba ke muwekîlanê xo Rayberê Şarê Kurdî Abdullah Ocalanî, Omer Hayrî Konar, Hamîlî Yildirim û Veysî Aktaş ra xeberêke bigêrê ancî Komîteya Vergirewtişê Îşkenceyî (CPT) ya Konseya Ewropa rê muracat kerd.

Avûkatan tewr peyên 21ê çeleyê 2024î de muracatê CPTyî kerdbî. 

Muracat de ame waştene ke rewşa oncommunicadoyî (xebere nêgirewtiş) wa biqeda û destûr bêro dayene pêvînayîşanê keye û avûkatan. Muracat de ame vîrvistene ke mabênê hîrê mengan de avûkatan 26 reyan û keyeyan 13 reyan seba pêvînayîşî muracatî kerdî la cewab nêdîyo muracatan.

Avûkatan da zanayene ke Abdullah Ocalanî heta nika teyna 5 reyî avûkatan de û 5 reyî zî keyeyê xo de pêvînayîş kerdo û 3yê adara 2020î de reya verêne û peyêne heqê xo yê telefonî şuxilnayo. Avûkatan vat ke 2020 ra nata Rayberê Şarê Kurdî ra xeberêke nêna girewtene.

Avûkatan îfade kerd ke muracatê înan binê bahaneyanê sey 'cezayanê dîsîplînî' de bi hawayêkê sîstematîkî yenê astengkerdene.

Avûkatan dîyar kerd ke tarîxê nêzdîyî de Girawa Îmraliyî ya Gemlîkî de erdlerzî qewimîyayê û mîyanê komelî de qesawetê serê weşîya Ocalanî zêdîyayê. 

Muracat de ame vîrvistene ke tepişteyê sîyasîyî 27ê teşrîna peyêne ya 2023yî ra  nata seba çareserîya meseleya kurdan û wedaritişê tecrîdî grevê vêşanîye de yê. Avûkatan waşt ke seba ke mergî nêqewimîyê û grev biqedo ganî CPT gamanê hewceyan bierzo.

Muracat de ame waştene ke wa CPT vera tecrîd û îşkenceyê Îmraliyî tewirêkê zelalî bimojno û raporanê xo yê serê zîyaretanê Îmraliyî eşkera  bikero. Avûkatan nê çîyî waştî:

''Ganî şert û mercê Zîndanê Îmraliyî goreyê rûmetê merdiman bêrê kerdene.

CPT seba ke avûkat û keyeyî şorê Îmraliyî, muwekîlê ma bieşkê heqanê xo bişuxilnê û qedexeyî biqedê wa înîsîyatîf bigêro xo ser.

Zîyaretê şima yê 22yê êlula 2022yî ra nata şert û mercê Îmraliyî hema zî zelal nîyê. Coka ma wazenê ke heyetê şima wa ancî şoro Zîndanê Îmraliyî.''