Avûkatê Ocalanî Bîlmez: CPT ganî cade bikewo dewre

Avûkatê Rayberê Şarê Kurdî Abdullah Ocalanî Îbrahîm Bîlmezî tecrîdî rê hêrsê xo ard ziwan û vat ke ganî sere de CPT dezgeyê Ewropa seba Îmrali cade bikewî dewre.

Rayberê Şarê Kurdî Abdullah Ocalanî ser o tecrîdo girankerde  yeno domnayene. 11ê  Êlula 2016 ra nata Ocalanî ra xebere nîna girewtene. Avûkatê Ocalanî  Bîlmezî Îmrali, CPT û MHMEyî ANFyî rê ercnayî.

Bîlmezî bale ante bêhuqûqîya Îmrali ser û va: ‘‘Tecrîdê Îmrali serra 1999î ra esto û çend şino xorî beno. Xora no tecrîd pabesteyê komploya mîyanneteweyîye yo. Na komplo ke şexsê Ocalanî de azadîya kurdan hedef girewtêne ewro zî dewam kena. Hêzanê serdestan waşt ke Ocalanî binate ra wedarî la hemverê fikir û îdeolojîya Ocalanî de ê bi xo çîn bîyî.‘‘

Bîlmezî vist vîrî ke heme muracatê pêvînayîşê Ocalanî yê înan yenî redkerdene û wina domna: ‘‘ Heta nika bi behaneyanê cîya cîyayan pêro muracatî ameyî redkerdene. Roja verêne ra Îmrali de huqûq çîn o. Tirkîya pede-pede huqûqî ra dûrî kewena.‘‘

Bîlmezî derheqê qerarê Mehkemeya Heqanê Merdiman a Ewropa (MHME) de zî hêrsê xo ard ziwan û va: ‘‘Qerarê MHMEyî sîyasî yo û ê bi nê qerarî amacê xo ra dûrî kewtî. Xora pawitişê Birêz Ocalanî nê dezgeyan ra çîn o. Nika rolo pîl ê CPTyî yo. Ganî CPT cade şiro Îmrali û derheqê weşîya Ocalanî de bi raporêk zanayîş bido rayapêroyî.’’  Ganî sere de CPT, dezgeyê Ewropa cade bikewî dewre.''

Bîlmezî bale ante muhîmîya rolê Ocalanî ser û qiseykerdişê xo wina qedîna: ‘‘Ocalan rayberêko bitesîr o û hetkarê aşitîye yo. Meseleyê kurdî de muxatabê dewleta tirkî Ocalan o. Mesajê Ocalanî yê Newrozî hetê bi mîlyonan ra ameyî goşdarîkerdene û seba şaran bîyî umîd. Ocalan pawitişanê xo yê ke şawitî  MHMEyî de vano ke ‘Ez seba meseleyê kurdî yena muhakemekerdene û binê tecrîdî de ya. Heta ke meseleyê kurdan hal mebo, meseleyê  Rojakewtena mîyanêne zî çareser nêbeno û ez zî azad nêbena.‘ Dewlete heta cayêk eşkena mudaxaleyê komelî bikero la nuqteyêk ra dima şar xo îdare keno.‘‘