Serekê DYA Donald Trumpî menga Sibate de bi rayîrê Twîtterî peyamêk weşanabi û vatibi, “DYA hemkaranê xo ra; Qralîyetê Yewbîyayeyî, Fransa, Almanya û hemparanê bînan ê Ewropayijan ra wazenê, seba muhakemekerkerdişê 800 ra zêdeyêr şerwananê DAÎŞ'î yê ke Sûrîye de ameyê tepiştene, game bierzê.”

Labelê welatanê rojawanî, sere de Almanya û Îngilîstan, waştişê Trumpî red kerdibî û rewşa DAÎŞ’ijanê welatanê Ewropayijan ê destê YPG’yî  de nedîyar bîbî. Hukmatê Almanî yê Federalî, seba ke DAÎŞ’ijê hem hemwelatijê Almanî hem zî hemwelatijê welatanê bînan ê ke nêagêrayê welatanê xo, qerar dabi ke bi lezabez qanûn bibedilnê.

Hukmatanê Danîmarka û Îngilîstanî zî bi eynî hawayî eşkera kerdîbî ke ê do hemwelatijanê endamanê DAÎŞ’î qebûl nêkerê. Nê welatan hetê bînî ra vengdayîşê YPG û QSD'yî yê seba muhakemekerkerdişê DAÎŞ'ijanê mehkemeyêka mîyanneteweyîye, peygoş kerdibi. Eksê nê welatan, Awusturya na babete de gamêka muhîme eşte.

Pêşnîyaza mehkemeyêka manena ya Ruanda

Wezîrê Karanê Zereyî yê Awusturya Hebert Kîckl babeta muhakemekerdişê DAÎŞ’ijan de mehkemeya sûcdaranê şerî yê mîyanneteweyî de bi însîyatîf werişt û mîyanê Yewîya Ewropa de kewt mîyanê têgêrayîşî . Kîcklî Komîsyonê Yewîya Ewropa rê mektubêk nuşte û Yewîya Ewropa ra waşt, seba DAÎŞ’ijanê ke weş ameyê tepiştene însîyatîf bigêrê.

Kîcklî ard ziwan, seba DAÎŞ’ijanê ke sûcê şerî kerdo mehkemeyêka herême bêra awankerdene û tede bêrê muhakemekerdene, o Wezîra Karanê Teberî Karîn Kneîssle reyde karêkê hemparî keno. Wezîrê Karanê Zereyî yê Awusturya Hebert Kîcklî da zanayene, DAÎŞ’ijê ke weş ameyê tepiştene xeylî welatanê Ewropa eleqedar kenê û vat, seba ke feyde tecrubeyanê verênan ra bêro girewtene ganî  Neteweyê Yewbîyayeyî reyde xebetêkê hamparî bêrê kerdene.

Kîcklî ard ziwan ke, seba muhakemekerdişê DAÎŞ’ijan sewîyeya bese de şahîd û delîlî estê û vat, mahkemeya sûcdaranê şerî yê mîyanneteweyî ya ke verê cû muhakemeyê berpisîyaranê şerê zereyî yê Ruandayî kerdibi, Ewropa eşkena sey nimûneyêk bigêra.

2800 ra zêdeyêrî çeteyê DAÎŞ’î netîceyê operasyonê yewîyanê taybetan ê YPG’yî de ameyî tepiştene û nika Hespisxaneyanê Rojawanî yê Kurdistanî de yê. Nînan ra 800 ra zêdeyêrê ci 46 welatanê cîyayîyan ra yê ke zafaneyê înan hemwelatijê rojawanî yê. Heta nika teyna Fransa, Endonezya, Rûsya, Fas û Sûdanî hemwelatijê xo yê ke hetê YPG’yî ra weş ameyê tepiştene, rayberîya Rojawanî ra waştê.