Tarîxnas û nuştox Erdogan Aydinî ANFyî rê weçînayîşê krîtîkî yê 14ê gulane ercnayî. 

Aydinî pare kerd ke ganî pêro hêzê demokratîkî tercîhê xo raşt bikerê û vat: ''Weçînayîşê 14ê gulane zaf krîtîk ê.Ganî hêzê demokratîkî seba serekomarîye Kiliçdaroglu û seba wekîlîyan Partîya Çep a Keske tercîh bikerê. Xora meseleyê Tirkîya bi weçînayîşan cade çareser nêbenê. La tewr nêbo welat do bieşko nefesêkê rehetî bigêro, heq û azadîyî û demokrasî do aver şorê.''

Aydinî da zanayene ke nê weçînayîşan de temamîya Tirkîya do vaja 'hînî bes o' û vat: ''Îqtîdarê AKP-MHPyî hînî wextê xo dekerdo. La ma xo vîr a nêkerê ka AKP ser bikewo zî şensê xo yê îdareyê Tirkîya vînî kerdo. AKP ser bikewo zî ekonomî hol nêbena, têkilîyê teberî raşt nêbenê. Ma hêvî kenê ke AKP do ser nêkewo.''

Aydinî dîyar kerd ke eke muxalefet bibo îqtîdar têkilîyê Tirkîya yê mîyanneteweyî do hol bibê û ekonomî bineyk rehet biba. Aydinî vat: ''Seba Tirkîyaya demokratîke ma rê Partîya Çep a Keske lazim a. Partîya Çep a Keske do bieşka Meclîsî de her kesî bi xurtî temsîl bikera. Ma do pîya bivînê ke roja weçînayîşî de çi vurîyayîşî bibê.''