Rojnameger Sînan Aygul qezaya Tetwanî ya Bedlîsî de dima ke derheqê bêusûlîya şaredarîya AKPyî de xeberî kerdî raştê hêrişî amebi. Hêrişî ra dima pawitoxê şaredarî Yucel Baysal û polîs Engîn Kaplanî nêrazîbîyayîşê şarî ser o ameybî destbendkerdene û bi sûcdarîya 'qestî ra birîndar kerdişî' ra tepişîyabî.

Rojnameger Sînan Aygulî derheqê babete de ANFyî rê qisey kerd.

Aygulî da zanayene ke îhaleya rotişî ya malanê şaredarîye est a ke tede bêusûlîye yena kerdene. Aygulî vat: ''Mi na bêusûlîye teşhîr kerde. Coka ez tim hedefê înan de bîya. Bi nê hêrişî înan waşt ke mesajê 'Ma do dizdî û bêusûlîye bikerê la çew wa vengê xo nêkerê' bidê. Mi mesaj fam kerd û naye ra pey ez do hîna zaf şora nê serebûtan ser. Ez do bêveng nêmana û hîna zaf bixebita. Tetwan cayêko qij o, ez tîya de şinasîyena. Rixmê ney zî ê eşkayî hêrişê mi bikerê. Înan no hesab nêkerd ke hêrişê înan raştê hende nêrazîbîyayîşan bêro. Înan seba ke mi bikişê hêriş kerd. Ez teqîb kerda û çeke ante. Hêrişkerî zî xora merdimê şaredarî yê.''

Aygulî pare kerd ke Tirkîya de azadîya îfade û çapemenîye meseleyêka cidî ya û vat: ''20 serrî yo meseleya çapemenîye û îfade est a. Qanûnê ke yenê amadekerdene zî seba rojnamegeran û azadîya xebergirewtişî ney, vera rojnamegeran ê. Wazenê çapemenîye asteng bikerê, kontrol bikerê û sansur bikerê. Tirkîya û Kurdîstan de rojnamegerîye zaf tehlukeyîn a. Tarîxê ma yê çapemenîye de bi desan embazê ma şehîd bîyî, raştê hêrişî ameyî. Mumkîn nîyo ke tîya de çew qala azadîya çapemenîye bikerê. Heyf ke no welat rojnamegeran rê bîyo sey cehenemî.''