Namzeda Partîya Çep a Keske ya Dêrsimî Aytene Kordu derheqê weçînayîşanê 14ê gulane de ANFyî rê qisey kerd.

Aytene Kordu da zanayene ke ê Dêrsim de bi coşêkê pîlî yenê pêşwazîkerdene û vat: ''Ez bi kelecanî bîya. Mi şarê Dêrsimî ra hêzêko pîl girewt. Dêrsimî xora namzedêka cinîye waştêne. Dêrsim de keda cinîyan est a, tîya de cinîyî şaristan îdare kenê.''

Aytene Kordu îfade kerd ke Partîya Çep a Keske wayîra bernameyêkê xurtî ya û vat: ''Meseleyê pêroyî reyde Dêrsim wayîrê meseleyanê xoseran o zî. Dêrsim nameyê xo apey wazeno. Hema zî cayê goranê Seyîd Rizayî û embazanê ci eşkera nîyo, şarê Dêrsimî wazeno cayê goran eşkera bibê. Reyna şaristan de ciwanê ma ziwanê xo nêzanenê. Ez zî bi xo domanêka asîmîlasyonî ya. Ez nêeşkena pê ziwanê xo qisey bikera. Ziwanî ser o bêguman xîretê ma do zêde bibê. Ma do Meclîs de xîret bikerê ke ziwanê ma kirmanckî bibo ziwano fermî û perwerdeyî. Reyna bawerîya ma binê tehlukeyî de ya. Dewlete seke cayê turîstîk ê nêzdîyê caya zîyaretanê ma bena. Ez Meclîs de seba ke dersê dînî yê mecbûrî wedarîyê do xîret bikera.''

Aytene Kordu bale ante ser ke vera cografyaya Dêrsimî talan est o û vat: ''Bi awbendan, madenan xozaya ma yena çinkerdene. Bi polîtîkayanê şerê taybetî koyê ma dîyenê bombayan ver. Daristanê ma yenê vêşnayene. Destûr nêdîyeno ke şarê ma abigêro dewanê xo. Ma do bikerê ke haştîye bêra erdê ma, meseleyanê xo bi dîyalogan çareser bikerê û şerî biqedînê.''

Aytene Kordu eşkera kerd ke Dêrsim de polîtîkayanê dewlete ra heywankarîye qedîyaye, şar vera koç keno û vat: ''Vajîyeno ke panc heta 6 hezar hemwelatîyê Dêrsimî şîyê teberê welatî. Ma vera ney zî bixebitê û zîret-heywankarîye teşwîq bikerê, kooperatîfan awan bikerê. Dêrsim de ciwanî yenê dejenerekerdene, madeyê tîryakî vila benê. Şarê ma qerqilîyeno ke domanê înan bibê tîryakî. Ma vera şuxilnayîşê nê madeyan zî tedbîranê xo bigêrê. Xora nê pêroyî bernameyê ma de est ê. La xora merdimî wazenê ke nê meseleyî pêro Meclîs de bêrê çareserkerdene.Ma do bi xoserî ûkulturê xo goreyê waştişanê şarê xo meseleyanê Dêrsimî çareser bikerê.''

Namzeda Partîya Çep a Keske ya Dêrsimî Aytene Kordu peynîya qiseykerdişê xo de bale ante asayîşê sindoqan ser û wina venga şarê Dêrsimî da: ''Hayîya şarê ma pê her çî est a. Şarê ma zî vano ke do rayêke bido Partîya Çep a Keske, rayêke zî bido Kemal Kiliçdarogluyî. Nê weçînayîşan de asayîşê sindoqan zaf girîng o. Her merdimê/a ma ganî sey wezîfedaran têbigêro/a û wayîrê raya xo vejîyo/a. Seba asayîşê sindoqan destê ma ra çi bêro ma do bikerê.''