Hakan Arslano ke wextê qedexeyê tebervejîyayîşî yê Sûrê Amedî de 2ê kanûna 2015î de şehîd bibi esteyê ci 7 serran ra dima hetê dozgerîye ra  perey zereyê yew tewreyî de dîyayî babîyê ci. Baroyê Amedî gerreyê dozgerîye kerd. Babîyê Arslanî derheqê babete de ANFyî rê qisey kerd.

Babî Alî Riza Arslanî da zanayene ke ê 7 serrî yo gêrayêne cenazaya lajê xo û cenaza sibata 2021î de Sûrî ra ameye vetene, ameye berdene bi Dezgehê Tipê Edlîyî yê Îstanbulî û 9 mengan uca de verdîyaye.

Arslanî pare kerd ke serrêke û nêm ra zêde yo înan zehmetî anta û vat: ''Peynî de ez ameya Edlîyeya Amedî. Dima selahîyetdarêkî esteyê lajê mi zereyê yew tewreyî de teslîmê mi kerdî. Mi çîyêko winasên nêpawitêne. Pero Amed seke mi ser de rijîya. Eke lajê mi biciwîyayêne nika 28 serre bibîyêne. Mi pê zorî xo tepişt. Ez nêzanena senî şîya Erziromî. Ez se vaja, ez helîyena la çew vengê mi nêeşnaweno. Çîyêk nêno verê fekê mi ke ez vaja.''

Babî Arslanî ard ziwan ke wexto ke cinîya ci na rewşe eşnawita nêweş kewta, wedarîyaya nêweşxane û serûm dîyayo ci.

Avûkatê keyeyî Ferhat Kilinç amadekarîye keno ke derheqê Dozgerîua Komara Amedî de gerre bikero. Kilinçî îfade kerd ke dima ke rojnameyêk de xeberêke vejîya ê pê hesîyayê ke Sûrî ra cenazayêke ameya vetene û vat: ''Ma vanê qey Sûr de cenaza kewta verê kepçeyî.Xebere de ameyêne vatene ke bedenê cenaza de rêçê guleyan est ê. Key ez biresa raporê otopsî ez do na babete de gerre bikera. Çunke îdîa û îsbatêk derheqê endamîya rêxistine ya Arslanî de çin a. Goreyê dosya sivîlêk o ke dinyaya xo bedilnaya.''

Kilinçî da zanayene ke cenaza 9 mengî Dezgehê Tipê Edlîyî de verdîyaya rixmê ney zî kar û gureyê otopsî yê hewceyî nêameyê kerdene.Kilinçî îfade kerd ke Sûrî ra zaf cenazayî ameyê vetene la testê DNA nênê kerdene. Kilinçî ard ziwan ke ganî cenaza bi tabûtî teslîmê keyeyî biameyêne kerdene û vat: ''Dezgehê Tipê Edlîyî belgeyê mergî dayo la belgeyê sewqkerdişî nêameyo dayene. Rewşanê winasênan de ganî şaredarîye wesayîtê cenaza bida. Keyeyî belgeyê mergî û dewî dozgerîye ra waştê û şaredarîye ra zî wesayît waştyo. La nê waştişî nêameyî caardene. Bi fermanê dozgerî esteyî zereyê tewreyî de teslîmê keyeyî ameyî kerdene.''

Kilinçî peynîya qiseykerdişê xo de vat ke kerdişêko winasên dûştê wijdanê merdiman o û da zanayene ê do gerreyê dozger û meqamanê edlîyan bikerê.