Taxa Çulî ya qezaya Rezanî ya Amedî de 21ê tebaxe ra nata Narîne Gurana 8 serrî vindîbîyaye bîye. Cenazaya Narîne badê 19 rojan zereyê ciwal de verê dereyî de nimite ameye dîyene.

Nevzat Bahtîyarê ke  îtîraf kerd ke ê bi xo cenazaya Narîne Guran berde dere de naye ro, Edlîyeya Dîyarbekîrî de îfadeyê ci yê dozgerîye temam bi. Badê îfadeyê 5 saetan Bahtîyar bi sûcdarîya ''kiştişê bi qestî yê domanêke''  sewqê Dadgerîya Cezaya Sulhî bi. Dadgerîye çarçewaya eynî sûcî de qerarê tepiştişî da.

Hetê bînî ra Serdozgerîya Komare ya Dîyarbekirî derheqê waya Narine Guran, Tuline Guran de ya ke 2019 de dinyaya xo bedilnaye, tehqîqet da destpêkerdene.