Hemserekê Pêroyî yê Partîya Demokrasîyî û Têtûştîye ya Şaran (DEM Part) Tuncer Bakirhan çarçewaya xebatanê weçînayîşî de tewrê têhetameyîşê şarî yê Dêrsimî bi. Xeylêk kesî tewrê têhetameyî bîyî ke Meydanê Seyîd Rizayî de ame kerdene. Namzedê Şaredarîya Dêrsimî Birsene Orhan û Cevdet Konak û pabesteyê Îtîfaqê Dêrsimî zî tewrê têhetameyîşî bîyî.

Têhetameyîş de sloganê , “Jin, jiyan, azadî” bîyî berz. Namzedanê Dêrsimî mesajê Dêrsim DEM o dayî.

Bakirhanî vat, ''Ez sere berz a ke pîya bi tornanê Seyîd Rizayan, hemrayanê doktor Şîvanî, erdê Alîşêran, Mahîran, Îboyan, Denîzan, Zarîfeyan û Sakîneyan de ya.''

Bakirhanî ard ziwan bi ''operasyonanê Tuncelî'' yeno waştene ke Dêrsim bêro bênasnamekerdene û nê vatî:  ''Ma şaredarîya xo de nameyê Dêrsimî nuştbi la qeyûmî a tebale dart we. Ma soz danê ke ma do a tebala newera bidaliqne.

 21 serrî yo ke elewîyan û kurdan ciya tepişenê înan rê neheqîye kenê. Erdogan elewîyan sey 'tewir' pênas keno. Hema nêzano elewîtîye çîya. Kurdan rê zîndanan û vêşanîye ferz keno. Vano 'doman, cinî ferq nêkeno çîyo ke hewce keno bikerê.' Nê dişmenê xoza ya ma, kurdan û cuyeya ma yê. Çar hetanê Kurdîstanî ra do cewabê na dişmenîye bêro dayene.

Herra Dêrsimî pê HESan kerd de. Qîm nêkerd Dêrsim de 150 heb ruhsatê madanî dayî sermayedaran. Vera nê ruhsatan çîyo ke destê ma ra yeno ma do bikerê.  Hêrişê xoza, bawerî û nasnameyê ma kenê. Nêşarmîyenî vanê înan qet çewî rê neheqîye nêkerda. 38an de qirkerdiş kerd, 94 de dewî vêşnayî, ma surgun kerdî, kerd ke ma tîya ra vejê.  Nika wazenê Dêrsimî bikerê bêmerdim û bêkurd. La şarê Dêrsimî 38an ra nata çirey peyser game nêeşte do ewro ra tepîya zî cewabê tewr rinî bido înan.

Îqtîdarê AKP-MHPyî îqtîdarê rijnayîşî yo. DEM Partî, Îtîfaqê Dêrsimî û kedkarî do rijnayîşî temîr bikerê. Îtîfaqê Dêrsimî têna semedê weçînayîşî nîyo, îtîfaqê vera talanî yo, îtîfaqê nasnameyê şorişgêrîyo.''