Wekîlê Partîya Çep a Keske yê Sêrtî Tuncer Bakirhanî derheqê prosesê peyê weçînayîşan û xebatanê înan de ANFyî rê qisey kerd. 

Bakirhanî da zanayene ke kerdoxo esas şar o û naye ra pey ê do keye bi keyeyî bigêrê û goş bidê meseleyanê şarî ser.Bakirhanî bale ante hêrişanê vera Partîya Çep a Keske û HDPyî ser û vat ke nê hêrişî parçeyê konseptê tasfîyekerdişî yê. 

Bakirhanî ard ziwan ke raşt nîyo ke weçînayîşan ra dima kesayetan ser o nîqaşî yenê kerdene û vat: ''Şar hêrsbîyaye yo û xora gêreno mesuldaranê ney. La kesayetî demkî yê û êyê esasî têkoşîn û paradîgmayê ma yê. Ganî nîqaşî nameyanê kesayetan ser o bêrê kerdene. Xora werte de yew binkewtiş est o. La ganî ma armancanê xo ser o qisey bikerê. Vera Îtîfaqê Kede û Azadîye zî rexneyî est ê. Ma giranîye danê nê rexneyan ser. Partîyê îtîfaqê ma zî prosesê rexneyan de yê.  Hetê bînî ra raştîyêke est a ke ma nêeşkayê şarê xo rê bi zelalî qala Rayîrê Hîrêyînî bikerê. Rayîro hîrêyîn seba çareserkerdişê meseleya kurdan tek rayîr o. 

Ma reyna nêeşkayê  'tirkîyayîjbîyayîşî' şarî rê bi zelalî îfade bikerê. No qisey nêno a mana ke wa kurdî tirk bibê. Ma do bingeyê Rayîrê Hîrêyînî de xîret bikerê ke qala na paradîgma hîna bi zelalî şarê xo rê bikerê. Ma neçare yê ke şarê xo rê rexneyanê xo bidê û goş bidê rexneyanê înan ser. Şarê ma yo ke heta nika bedelê giranî dayî hêrsbîyaye û zerrîşikîyaye yo ke no zî normal o. Ma do xîret bikerê ke şarê xo tewrê mîyanê her prosesî bikerê û waştişanê înan tim bîyarê ziwanî. Şarê ma, çimeyê hêzî yo esas o. Îqtîdar keno ke pê prpvakasyonan mabênê ma û şarê ma bixeripno. La şarê kurdî pê tecrube, feraset û zanayîşê xo yê sîyasetî kayanê îqtîdarî ser o hayîdar o. Ma do qetî bêhêvî nêbê û têkoşînê xo rê dewam bikerê.''