Meclîsê Partîye yê DEM Partî merkezê partî de kombîyayîş kerd ke xeta têkoşînî ya nêwî bewlî bikero. Hemserekê Pêroyî yê DEM Partî Tuncer Bakirhanî verê kombîyayîşî averşîyayîşê aktuelî erjnayî.

Bakirhanî vat: ''AKP-MHP seba ke îqtdarê xo bidomnayene şer û pêkewtişan wazeno. 2015î ra nata na rewşe dewam kena. Vanê Şerê  Dinya yo Hîrêyin, meseleya asayîşî, sîstemê demokratîkî yê Rojawanî sey tehdîtî hesibnenê.  Çi eleqa û gureyê înan Herêma Kurdîstanê Federalî de est o? Koyan, newelanê Amedîyê de baregehan û kalekolan virazenê.  Eşkerayo ke îqtîdar nê hema dano domnayene. Şar feqîrîye anceno. Kedkarî derê îdareyê xo de yê, welat de feqîrîye est a. Îqtîdar vizêr Rojawan de ewro Başûr de peyê şer û pêkewtişan de yo. Ma vera nê vejîyenê, nê qebul nêkenê. Ganî muxalefet zî vera nê vengê xo berz bikero. Çunke no şerê îqtîdarê AKP-MHPyî yo. Şerê şaranê Tirkîya nîyo.

Kurdî tehdît nîyê. Şarê Başûrê Kurdîstanî semedê asayîşê Tirkîya tehdît nîyo. Îqtîdar seba ke îqtîdarê xo bido domnayene Başûr de dişmenêk afirneno ke ûcayî biaçarno warê şerî.  No şerê ma nîyo, coka ma sey vizêrî ewro zî vera nê vejîyenê. Îqtîdar seba ke kurdî mebê wayîrê xoserîya demokratîke û statuyî ekonomîya Tirkîya şerê vera Rojawan û Başûr de xerc keno. No îqtîdar wazeno şaranê Tirkîya vêşan biverdo û bedelê ci çi beno wa bibo îqtîdarê xo bido domnayene. Îqtîdarî çim verdayo destkewteyanê kurdan. Ez wazena tîya ra veng bidê îdareyê Başûrê zî. Qay Hûmayî şima senî yew îdareyê ke dewleta tirke yena herra şima îşxal kena şima zî paştî danê ci. Ma reca dexalet kenê vera polîtîkya îşxalî bivejîyê.''