Bajarê Hamburgî yê Almanya de çarçewaya hemleya Abdullah Ocalanî rê azadîye, meseleya kurdan rê çareserîya sîyasîye de  bi tewrbîyayîşê Sîyasetmedar Dr. Îdrîs Baluken û Hemsereka KCDK-E Zubeyde Zumrut kombîyayîşê şarî ame kerdene. Kombîyayîşo ke semtê Bergedorfî  de ame kerdene nizdê 300 kesan tewrê ci bîyî.

Kombîyayîş bi rêzgirewtişê semedê şehîdan ame destpêkerdene. Verî Zubeyde Zumrut qisey kerd. Zubeyde Zumrut Jîna Emînî ya ke hetê hêzanê dewleta Îranî ra ameye qetilkerdene, yad kerd û vat: ''Slogana Jin Jiyan Azadî hinî slogane ra vejîyaye semedê cinîyan ê bindestan ê dinya bîye çimeyê îlhamî.''

Zubeyde Zumrut nê vatî: ''Kurdî wazenê welatê xo de sey heme şaranê bînan ê dinya bi ziwanê dayîke û îradeyê xo biciwîyê. Çi heyf ke no waştişê înan tim raştê qirkerdiş û zextan yeno. Yeno waştene ke waştişê azadîye yê kurdan bi xeta îxanetî ya PDKyî bêro qedînayene. Keyeyê Barzanîyan semedê menfeatê xo Başûrê Kurdîstanî kerdo bexçeyo peyên ê dewleta tirke. Dewleta tirke ya ke pêşmergeyî kerdî bêîrade Başûrê Kurdîstanî îşxal kena. PDK eşkera nê şerî hetê dewleta tirke geno. 

Kenê ke bi polîtîkayanê tecrîd û îzolasyonî yê vera Rayberê Şarê Kurdî Abdullah Ocalanî xeyalanê ma yê azadîye birijnê û ma bê rayberîye biverdê. Cewabo tewr pîl ê vera komployî 25 serrî yo Îmrali de hetê Abdullah Ocalanî ra yeno dayene. Seke şima zî zanê 43 mengî yo tira qet xeberêke nîna girewtene. Dewleta tirke polîtîkaya tecrîdî vera şarê ma sey tehdîtî şuxulnena. Ganî ma vera nê tecrîdî qiyamet bîyarê. Şarê ma yê dîaspora ganî binêna zaf destê xo bikero binê kerra.''

Îdîs Balukenî zî bi kirdkî qisey kerd û nê vatî: ''Vera zext û îşxalî sey şarî teberê xoverdayîşî de yewna rayîrê ma çîn o.  Şarê ma yê Ewropa ganî sey vizêrî ewro zî wayîrê keda xo bivejîyo, rolê xo bîyaro ca. No şar fedakar o, semedê azadîya xo her qeyde bedelî girewtî çim. Ma azadîye û rojanê rindan rê her wextî ra zafêr nizdî yê. Qet hêzêk nêeşkeno verê îradeyê şarî de vindero. Êyê ke wazenê estbîyayîşê xo serê çînbîyayîşê ma de înşa bikerê do çirey meresê waştişê xo. Vervejîyayîşê tecrîdî yeno manaya wayîrvejîyayîşê merdimîye. Tecrîd têna meseleya kurdan nîya, meseleya her kesî ya. Birêz Ocalan 25 serrî yo sey sembolê merdimîye û cuyeya bianore Îmrali de xover dano.

Tecrîd eynî wextî de verê yewîya neteweyî de astengo tewr pîl o. Ganî şarê ma tewrê çalakîyanê vera tecrîdî bibo. Teberê xoverdayîşî de yewna rayîrê ma çîn o. Zulmê înan çend gird beno wa bibo senî ke ma heta ewro verê înan de sare ronêna,çaqê xo nêşikitî ma do ewro ra tepîya zî milê xo sereyê xo romenê. Dewaya ma dewaya Şêx Seîd Efendî, Pîr Seyîd Rizayî ya, ma tornê Qazî  Mihemedî yê, ma hevalê Mehmet Xeyrî, hevalê Kemal, hevalê Sakîne, hevalê heme şehîdanê Kurdîstanî yê. Aye ra ma de milronayîş, çaqişikitiş çîn o.''