Vervatoxa Meclîsê Cinîyan ê HDPyî Ayşe Acar Başaran bînaya merkezî ya HDPyî de kombîyayîşêkê çapemenîye kerd û rojdem ercna.

Qiseykerdişê Başarane ra beşêk wina yo:

''17 rojî yo ma prosesê qefilnayîşî de yê. Welat de karker, kedkar û cinîyî binê zehmetîyan de yê la faşîzm hêrişker û dişmenê cinîyan teber de gêrenê. Herinda ke îqtîdar paştî bido şarî operasyonanê şerî rê dewam keno.

Îqtîdar operasyonanê teberê sînorî keno, pereyan dano cergan, SÎHAyan gêno, budçeyê xo dano şerî. La meseleyanê şarî çareser nêkeno. Xizanîye ha agêrena welatî. Her roje merdimî gês ver  xo kişenê. La îqtîdar pê operasyonanê teberê welatî raştîye mîyan keno.

Îqtîdar verê ci gêno ke vengê Birêz Îmraliyî bireso şarî. Birêz Ocalan 22 serrî yo binê tecrîdî de yo ke no tecrîd yeno manaya şerî. Tecrîd sey xizanîye, vêşanîye agêreno. Ma bi israrî wazenê ke tecrîdê vera Birêz Ocalano ke îradeyê çareserîye yo bêro wedartene, polîtîkayanê asayîş û şerî ra fek bêro veradayene. Tecrîd têna meseleya kurdan nîyo çunke faturaya ci hetê bindestan, kedkaran, karkeran û xizanan ra dîyena.

Prosesê keyeyê mendişî de tewr zaf cinîyî binê tehlukeyî de yê. Menga nîsane de 68 cinîyî maruzê şîdetî bîyî, tewr tay 17 cinî û domanî merdî. 2021 de bi temamî 108 cinîyî ameyî qetilkerdene, 74 cinîyî bi hawayêkê şikdarî merdî.

Îqtîdar nêwazeno şîdetê vera cinîyan biqedîno, wazeno cinîya mehqûle virazo. Polîtîkayê îqtîdarî  dişmenê cinîyan ê. Çewlîg de Rahîme Oz hetê çawişê pisporî ra maruza şîdetî menda û xîret kerd ke medyaya dîjîtale de vengê xo veja. Çunke o camêrd camêrdêko unîformakerde bi û şîdetî ra dima tira vat 'Ti şine ça şo' Ma no pratîk verî serebûtê Musa Orhanî ra zanenê. Musa Orhanî zî dima ke Îpeke Er rê tecawuz kerd vatbi 'Ti şine ça şo, ez nêna muhakemekerdene. Mi verî zî kerd.'

Ma vera şîdetê hetê cinîyan de yê û têkoşînê ney do bikerê. Ma do pawitişê Peymana Îstanbulî ra fek vera nêdê. Ma do seba embazanê ke Dewaya Kobanê de yenê muhakemekerdene vengê xo berz bikerê. Ma do bi xo cuya xo awan bikerê.

Ma do 11ê gulana ke serrgêra Peymana Îstanbulî ya do vajê 'Peymana Îstanbulî yê ma ya! Peymana Îstanbulî bîyarê ca!' ''