Vervatoxa Meclîsê Cinîyan ê HDPyî Ayşe Acar Başaran vizêr Merkezê Pêroyî yê partîya xo de kombîyayîşê çapemenîye de qisey kerd. 

Başarane kombîyayîş de vera bira wedaritişê heqê destpanêdayîşî yê wekîlîya Salîha Aydenîze nêrazîbîyayîşê xo mojna û îfade kerd ke Salîha Aydenîz qestî ra ameye hedefkerdene û lînçkerdene. Başarane vat: ''Aydenîze seba ke Hemsereka DBPyî ya û cinîyêka kurd a, hêrişan de têrî bîya. Ma do tim îradeyê şarî bibê û ney rê dewam bikerê.''

Başarane da zanayene ke 2015 de 303, 2016 de 328, 2017 de 409, 2018 de 440, 2019 de 474, 2020 de 471, 2021 de zî 497 cinîyî hetê camêrdan ra ameyê kiştene. Başarane îfade kerd ke Peymana Îstanbulî seba ke wedarîyaye şîdet û cînayetê cinîyan zî zêdîyayê.

Başarane dima vist vîrî ke 20ê temmuze de Qirkerdişê Zaxoyî de 9 hemwelatîyan hetê Tirkîya ra ameybî qetilkerdene û vat: ''Îqtîdar sivîlan dano bombayan ver û mesajê 'Şima şêrê kamca ma peyê şima de yê' dano. Ma na hişmendîye Roboskî, Şengalê, Rojava û Mexmûrî ra şinasnenê. Heta ke îqtîdar hesabê nê qirkerdişan bido ma do têkoşînê edaletî rê dewam bikerê. Seke zanîyeno 3ê tebaxa 2014î de DAÎŞî hêrişê Şingalî kerdbî û Şingal de qirkerdişêk kerdbî. Qirkerdişê Şingalî bi Qirkerdişê Zaxoyî dewam kerd. Ma tim hetê cinîyanê Şingalî de yê. Ma serrgêra 8. ya Qirkerdişê Şingalî de wazenê 3ê tebaxe sey 'Roja Çalakîya Mîyanneteweyîye ya vera Qirkerdişê Cinîyan' bêra îlankerdene.''

Başarane peynîya qiseykerdişê xo de vat: ''Ma vera şîdet, şer, xizanî, bêkarî û tecrîdî 6ê tebaxe de Amed de û 7ê tebaxe de Îstanbul de mîtîngan bikerê. Nê mîtîngî do dîyar bikerê ke kaosê Tirkîya qeder nîyo. Ma dîyar bikerê ke alternatîf û çareserîye ma yê.''