Komploya mîyanneteweyîye ya serê Rayberê Şarê Kurdî Abdullah Ocalanî ser a 20 serrî ravêrtî. Parlametera HPD’yî  ya Êlîhî Ayşe Acar Başarane serrgêra komlploye de derheqê tecrîdî de ANF’yî rê qisey kerd.

Başarane vist vîrî ke tecrîd 20 serrî yo bi hawayêkê sîstematîkî yeno domanayene û va: ‘‘Dewleta îşxalkare bi komploye waşt ke Rojakewtena mîyanêne de planê şerê zereyî bifîno dewre. La o wext Rayberê Şarê Kurdî Ocalanî bi cehdkerdişê  çareserîya haştî û demokratîke komplo pûç vete.  Birêz Ocalan wazeno ke bi muzakereyan meselaya Kurdî hal bikero. Dewleta Tirkî tecrîdê serê Ocalanî giran kena. Girankerdişê tecrîdî vernîya sîyasetî zî gêno. Çi wext şer beno gird, rayîrê haştî biryeno, o wext tecrîd zî xorî beno. Ameyoxê şaran  û sîyasetê Tirkîya rewşa Ocalanî ya giredaye yê. Hinî heme dinya  zana ke Ocalan halkerdişê meseleyê Kurdan de aktorêko muhîm o.‘‘

Başarane bale ante ke rixmê tecrîdkerdişî fikrê Ocalanî heme Rojakewtena Mîyanêne ra vila bîyî û wina dewam kerd: ‘‘Felsefeya Ocalanî projêyê komplokaran veng vetî. Hêzê Komplokarî wazenê ke timûtim herra Rojakewtena mîyanêne de şer bibo û ê zî  bi naye payra bimanê. La ma ewro vînenê ke perspektîfê Ocalanî Rojakewtena mîyanêne de zîl danê. Rojawan û fîkranê Ocalanî heme plan û projeyê hêzanê mîyanneteweyîye pûç vetî. Xora komlokaran roja verêne ra vînî kerd.‘‘

Başarane vat ke hêzê mîyanneteweyîye wazenê ke bi tecrîdî komplo newe bikerê û pest pa: ‘‘Birêz Ocalan 20 serrî yo bêhuqûq sey esîrî yeno tepiştene.  Bi girankerdişê tecrîdî huqûq yeno binpaykerdene û Îmrali de caardişê bînî kewenê dewre. Nê qanûnî hetê hêzanê koplokaran ra ameyî raameyene. Tarîxê Îmraliyî çiman verde yo. No zîndano taybet de Birêz Ocalan 24 saet mabênê 4 dêsan de  xover dano. Xora 3 serranê peyênan de  tecrîd bi girankerdiş açaryayo îşkence. Wextê çareserî de Birêz Ocalan semedê şaranê Kurdistan û Tirkîya bibê umîdêk. La îqtîdarê AKP’yî  û hêzanê xorîyan bi qerarê şerî waşt ke Kurdî çok bidê.‘‘

Başaranê bêvêngîya CPT’yî rê zî hêrsê xo ard ziwan û va: ‘‘ Tecrîdo ke Birêz Ocalanî ser o yeno bicaardene nimûneyê ci dinya de çîn o. 3 serrî yo merdimanê xo nêvîneno. Qerarê CPT û MHME’yî sîyasîyî û ê leteyêkê polîtîkaya hêzanê koplokaran ê. CPT ganî goreyê qanûnanê xo tê bigêro û bêvêng memano.

Başarane vist vîrî tecrîdê serê Ocalanî Rojakewtena mîyanêne ra vila bîyo  û qiseykerdişê xo wina qedîna: ‘‘Ewro sîyaseto demokatîk de cinîyan, ciwanan û komele serê tecrîd yeno bicaardene.  Xoverdayoxê Zîndanan  ke veng danê vengê Leyla Guvene û hemrayê ma yê bînî bi qerardaîya pîle xoverdayîşê xo danê domanyene.  Îqtîdar û Wezîrîya Edelatî bêvêng ê. Eke çîyêko xirab bibo, mesûldarê ney îqtîdar û meclîs ê. Seba ke çîyêko xirab mebo ganî her kes berpirsîyarîya xo bîyaro ca û veng bido vengê xoverdayoxan.‘‘