HDP çarçewa Kampanyaya 'Ma HDP yê, her ca de yê' de Xarpêt de şarî reyde kom bi. Serekwekîlo Pêroyî yê HDPyî Tuncer Bakirhan, Vervatoxê Meclîsê Cinîyan ê HDPyî Ayşe Acar Başaran, îdarekar û endamê rêxistinanê HDPyî yê Dêrsimî û Xarpêtî tewrê aktîvîte bîyî.

Verî Tuncer Bakirhanî qisey kerd û pare kerd ke ê dewaya Seyîd Riza û Şêx Seîdî ser o şinê û vat: ''Merdimê ke terefgîrê AKPyî nîyê karî ra yenê vetene. Wextê darbeya leşkerî de zî merdiman hende zulm nêdîyo. La ma do vera înan milê xo çewt nêkerê. Ma do sey HDPyî demokrasî bîyarê welatî û meselaya kurdan çareser bikerê.''

Dima Meclîsê Cinîyan ê HDPyî Ayşe Acar Başaran qisey kerd û bale ante ser ke îqtîdarê AKP-MHPyî hertim hêrişê HDP, cinîyan, muxalefetî keno. Îqtîdar nika keno ke şewatê welatî seke HDPyî kerdo bimojno. Coka şaristananê rojawanê welatî de şar hêrişê kurdan keno. Bi nê hawayî îqtîdar keno ke partîya mi biqefilno.''

Başarane vist vîrî ke zîndanan de 251 rojî yo grevê vêşanîye esto û vat: ''Sebebê nê grevî polîtîkaya şerî ya îqtîdarî û tecrîdê vera Birêz Ocalanî yo. Tepişteyî têna wazenê ke wa tecrîd wedarîyo û birêz Ocalan keye û avûkatanê xo bivîno. Ganî ma zî veng bidê waştişanê tepişteyan  û vera tecrîdî pîya têkoşîn bikerê.''