Paytextê Lubnanî de Beyrût de bi şîarê 'Pîya seba Rojhelatê Mîyanênî yê demokratîkî-rayîrê haştîye' ame kerdene. Roniştiş hetê Nicola Namiq ra ame îdarekerdene. Roniştişê diyînî yê konferansê Beyrûtî de Komployo Mîyanneteweyî û tecrîdê Îmraliyî ameyî nîqaşkerdene. 

Mamostaya Zanistanê Sîyasîyan a Zanîngehê Kahîre Dr. Ferînaze Etî bale ante Komployê Mîyanneteweyî ser û îfade kerd ke dewletanê mîyanneteweyîyan rixmê cîyatîyanê xo serê remnayîşê Rayberê Şarê Kurdî Abdullah Ocalanî û teslîmkerdişê ci de pêkerdo. Ferînaze Etî ard ziwan ke dewleta tirke Abdullah Ocalan heqê ci yê qijî ra zî bêpar verdayo û vat: ''Ocalan semedê fikranê xo ame remnayene. Ewropa fikranê ey ra tersena.''

Konferans de wasî û avûkatê Rayberê Şarê Kurdî Mazlûm Dînçî zî qisey kerd. Dînçî da zanayene ke Tirkîya wexto ke babete şina Ocalanî ser qanûnanê xo nêana ca. Dînçî vat: ''Bê Abdullah Ocalan Tirkîya de haştîye mumkîn nîya. Dewleta tirke projeyê Abdullah Ocalanî sey rîskî dî coka hêrişê ci kerd. Komplo hema zî dewam keno û Îmrali de vurîyayo tecrîdî. Nika 27 mengî yo Birêz ocalanî ra xeberêke zî nêna girewtene. Dewleta tirke destûr nêdana pêvînayîşan.''

Qiseykerdişê Dînçî ra dima Mamostayê Qanûnê Mîyanneteweyî yê Afrîkaya Başûrî Mehmûd Batilî semînerêk da. Batilî vat: ''Ma goreyê qanûnêkê mîyanenteweyî kar kenê. Ganî qanûnî seba Abullah Ocalanî zî bêrê caardene. Erkê ma yê pêroyînan o ke seba azadîya Ocalanî bixebitê. Ganî ma vengê xo berz bikerê û pîya vera zulmî vejîyê. Ganî her kes paştî bido Ocalanî û tepişteyanê tecrîdkerdeyan.''