Hemserekê Konseya Rayberdişî ya KCKyî Cemîl Bayikî Stêrk TV de rojdem ercna.

Qiseykerdişê Bayikî ra tay noqtayê girîngî wina yê:

''Ma dostanê xo reyde seba Rayber Apoyî 'Hemleya Azadîye' dabî destpêkerdene. Nika na hemle safhaya diyîne de dewam kena. Xeylêk merdimê wayîrwijdanî, demokrat û azadîwazî zî tewrê na hemle benê û vanê 'Şima nêeşkenê nê merdimî zîndan de hinî bitepişê. Wina xeylêk kesan CPT û Konseya Ewropa rê mektube şawite û azadîya Rayber Apoyî waşte. Senatorêkê Fransa zî Wezîrîya Edaletî ra waşt ke Rayber Apoyî zîndan de bivîno.

Tecrîdê vera Rayber Apoyî tecrîdêko giran o. Dewleta tirke Rayber Apoyî ra qesas gêna û şexsê Rayber Apoyî de şarê kurdî yeno tecrîdkerdene. Eke Rayber Apo azad bibo meseleya kurdan zî do bêra çareserkerdene û kurdî do azad bibê. Komîteya Vergirewtişê Îşkenceyî (CPT) wayîra îşkence û tecrîdê dewleta tirke vejîyena. CPT dezgehêkê Ewropa yo û hemkarê sîyasetê emperyalîzmî yo. Şarê ma ganî têkoşînê xo yê vera dezgehanê sey CPTyî xurtêr bikero.

Dewleta tirke nika Başûrî îşxal kena. Dewleta tirke bi ardimê PDK û keyeyê Barzanîyan kewta Başûrî. Dewleta tirke şaristananê Başûrî de ca da xo. Barzanîyan her çi vist binê xizmetê îşxalkeran. La gerîlayî vera îşxalî erd û şarê Başûrî pawenê. Coka ganî her kes wayîrê têkoşînê gerîlayan vejîyo. Gerîlayî fedakarîyanê pîlan kenê. Ganî şarê ma serkêşîya ciwanan de hetê têkoşînê gerîlayan de cabigêro.

Dewleta tirke seba ke qirkerdişê kurdan temam bikera wazena hêverî PKKyî çin bikera. Têgêrayîşê ma seba dewlete verê qirkerdişê kurdan de astengêko esas o. Dewleta tirke vera ma şerêkê giranî kena la nêeşkena netîce bigêra. Medyaya dewlete zî bi zûr û propagandayan raştîya nê şerî nimnena. Barzanîyî zî sey dewleta tirke têgêrenê. Medyaya Barzanîyan zî zûran kena. Tewr  peyên zî înan vat 'Bazarê Hewlêr û Kerkûkî PKKyî vêşnayî.' Mûsil, Kerkûk û Şingal de her çi binê kontrolê MÎT û Parastinî de yo. 

Wa  her kes raştîya Barzanîyan hol bivîna. PDK bi xo dişmenê PKKyî yo. Ardimê PDKyî ra nêbîyêne dewleta tirke nêeşkayêne gama xo bierza Başûrî. Nika mabênê PDK û PKKyî de şerêk çin o. Şerê PKKyî vera îşxalkeran û xayînan o. Ganî welatperwerî goreyê nê raştîyan têbigêrê. 

Barzanîyî Kerkûk de dewleta tirke reyde têgêrenê û nêverdenê ke walîyê Kerkûkî kurdan ra bêro weçînayene. PDKyî dewleta tirke berde Başûrî û Iraqî zî no qebul kerd. Iraq zî goreyê waştişanê Tirkîya têgêreno. Ganî hukmatê Iraqî nêbo hemkarê îşxalê dewleta tirke.

Sîyasetê Tirkîya yê serê Sûrîye ser nêkewt. Nika Erdogan gêreno ke Esad de pêvînayîşî bikero. La Esad zî şert keno ke wa hêzê dewleta tirke Sûrîye ra vejîyê. Şorişê Rojawanî kedanê Rayber Apoyî ser o ame awankerdene. Dewleta tirke coka dişmena nê şorişî ya. Şarê ma yê Rojawanî ganî wayîrê şorişê xo vejîyo. Seba çareserkerdişê meseleyan xora ganî Sûrîye de dîyalogî bêrê viraştene. 

Dewleta tirke seba ke kurdan çin bikera hêrişê kulturê kurdan kena. Merdimê ke govende gênê tepişîyenê, slogan û deyîrê kurdkî yenê qedexekerdene. Hetê bînî ra dewlete festîvalanê xo kena. Wa şarê ma nêşoro nê festîvalan. Şarê ma vera hêriş û tedayan ganî wayîrê ziwan, bawerî, kultur û nasnameyê xo vejîyo. Ganî ma rayîr nêdê otoasîmîlasyonî.''