Hemserekê Konseya Rayberdişî ya KCKyî Cemîl Bayikî derheqê weçînayîşanê 14ê gulane de cewab da persanê ANFyî.

Qiseykerdişê Bayikî ra tay noqtayê girîngî wina yê:

''Nîqaşê ke serê Rayber Apoyî yenê kerdene bêexlaq û bêwijdan ê. Hem Rayber Apoyî tecrîd kenê hem zî ey ser o nîqaş kenê. Îqtîdarê AKP-MHPyî zî ê bînî zî kenê ke Rayber Apoyî bikerê hacetêkê weçînayîşî. No qetî nêno qebulkerdene. Ewro xêrê paradîgmaya Rayber Apoyî ra AKP-MHP ameyo verê rijîyayîşî. Ewro kurdî û pêro hêzê demokrasî wazenê ke Rayber Apo azad bibo. 

Îqtîdarê AKP-MHPyî seba ke weçînayîşan de bin nêkewo hêrişê kurdan, têgêrayîşê ma û gerîlayan keno. Nê prosesê weçînayîşî de çend rojî verî xeylêk rojnameger, avûkat, sîyasetmedar û hunermendî ney ra tepişîyayî. AKP-MHP keno ke pê hêrişanê xo çimê kurdan û hêzanê demokrasî û azadîye bitersno. La îqtîdar se keno wa bikero do netîce nêgêro û bin bikewo. Erdogan û Soylu şarî tehdît keno û mesajê 'eke ma bin bikewê nêşorê, şer bikerê' danê. La nê pêroyî seba çimtersnayîşî yê. Şarê kurdî û hêzê demokratîk-şorişgêrî ganî vera nê hêrişan apey gamêke nêerzê û hîna bi qerardarî têkoşîn bikerê. 

AKP-MHP Îslamî xo rê keno hacet. Misilmanê raştikênî ganî zulmê nînan bivînê û hetê înan de canêgêrê. Reyna şarê kurdî bii taybetî hunermendî ganî bizanê ke AKP-MHP dişmenê înan o. Seke zanîyeno hunermend Cîhan Aymaz hetê faşîzmê AKP-MHPyî ra ame qetilkerdene. Ganî pêro hunermend û şarê kurdî wayîrê Aymazî vejîyo. Bi na wesîle ez keyeyê ey ra serweşîye wazena.

Botan qelbê têkoşînê Kurdîstanî yo. Şarê Botanî welatperwer o coka dewleta tirke ya faşîste tewr zaf şarê Botanî kena hedef. Dewlete nika bi hezaran erkdarê xo, leşker û hêzê taybtî Botan de cakerdê û kena ke weçînayîşan rê tesîr bikera. Şarê Botanî ganî bi xurtî cewabê nê kerdişan bido. Wa pêro şarê Botanî raya xo bido Partîya Çep a Keske. Vengdayîşê mi şarê Botanî rê wina yo.

Dewleta tirke kena ke eşîrê kurdî pêbikewê û dişmenîya yewbînan bikerê. Dewlete bi nê hawayî kena ke kurdan dîzayn bikera. Eşîrê kurdan bi taybetî wa eşîrê Botanî pê kayanê dewlete mexapîyê. Eşîrê kurdan wa seba xo têkoşîn bikerê. Bi nê hawayî eşkenê payan ser de vinderê. Ganî eşîrê ma pê Rayber Apo, şehîdan û têkoşînê azadîye bawer bikerê. 

Ez venga pêro qoricîyan zî dana ke wa nê weçînayîşan ra pey nê karî ra fek vera bidê. No seba înan firsend o. Wa qoricîyî hînî dişmenî rê ney şarê xo rê xizmet bikerê. Dewleta tirke dişmena pêro kurdan a. Şer de zî qoricîyan ver de şawena û dana kiştene. Wa qoricîyî nê weçînayîşan ra pey agêrê rayîrê şarê xo, raya xo bidê Partîya Çep a Keske û nê şerî ra xo bixelisnê.

Şarê Dêrsimî wa raya xo bido Partîya Çep a Keske

Dêrsim warê xoverdayîşî yo. Dêrsimî ra fermandar û şerwanê qehremanî vejîyayî. Dêrsim merkezê elewîtîye yo zî. Dewleta tirke kena ke pê polîtîkayanê şerê taybetî Dêrsim de elewîtîye û kurdayetîye biqedîna. Dewleta tirke û AKP-MHP dişmenê cografyaya Dêrsimî yê zî. Weçînayîşan de Dêrsim eşkeno teyna 1 wekîlî/e vejo. Wa şarê ma yê Dêrsimî hol bifikiro, raştîyan bivîno, wayîrê raştîya xo vejîyo. Ez pê bawer a ke şarê Dêrsimî do raya xo bido Partîya Çep a Keske û bi nê hawayî AKP-MHPyî ra hesab biperso.

Herêma Serhedî kelayanê têgêrayîşê ma ra yew a. Dişmenî kerd ke Serhed de ajanîye, qoricîtîye, asîmîlasyonî aver bero la nêeşka. Xebatanê weçînayîşî de ma moral û coşê Serhedî vînenê. Şarê Serhedî rixmê qedexe, hêriş û gefan zî qetî verê dewlete de çok nêşi erdî ro û do nêşoro. Şarê ma yê koçerî û Serhedî nê weçînayîşan de raya xo bidê Partîya Çep a Keske û qesasê qedexekerdişê wareyan bigêrê.''