Hemserekê Pêroyî yê Partîya Herêman ê Demokratîkan (DBP) Keskîn Bayindirî hêrişê vera têgêrayîşê sîyasîyî yê kurdan, mesajê kurdan ê Newroze û tecrîdê serê Rayberê Şarê Kurdî Abdullah Ocalanî ercnayî.

Bayindirî bale ante hêrişê îqtîdarî yê vera HDPyî ser vat:  ''Îtîdar pê konseptê hêrişî wazeno ke têgêrayîşê sîyasîyî yê kurdan û têkoşînê azadîye yê kurdan çîn bikero. La no konseptê îqtîdarê AKP-MHPyî sey vizêr ewro zî do ser nêkewo. Seba ke nêeşkayê verê HDPyî bigîgê dewaya qefilnayîşî akerde la şarê kurdî meydananê Newroze de cewabê înan da.

Îqtîdar wazeno ke dewaya qefilnayîşê HDPyî rojdem tepişo ke bi nayî HDP, şarê kurdî û şaranê Tirkîya rê zext bikero. Ma qerardarê ke vera nê hêrişan HDPyî bikerê kelaya xoverdayîşî ya merkezî. Partîya ma DBP zî pabesteyê HDPyî ya. HDPyî xetêka xurte ya têkoşînî  afernaya. Xora ma zanê nê hêrişî vera heme şaranê Tirkîya yê. Hesabê înan oyo ke eke HDP bêro qefilnayene wa herinda ci de alternatîfêk çînêbo. Binê nameyê 'roşnvîr' de vera partîya ma û HDPyî nuşteyî yenê nuştene. Nê semedî ra ma do HDPyî dahîna xurtêr bikerê.

Nê organîzekerdişê înan semedê bêalternatîfverdayîşê sîyasetê Tirkîya yê. Wazenê Tirkîya peyser berê bikerê sey wextê di partîyan. HDP sey aleternatîfê rayîrê hîrênî semedê înan tehluke yo. Ma televîzyonan de vînenê xo bi xo HDPyî qefilnenî û nayî ser o muneqeşe kenê. La nê raştîya komelî ra dûr ê. Ê zî ma zî zaf hole zanê ke bi milîyanan kesê ke paştî danê HDPyî cigêrayîşê yewna partîye dima nêkewnê. Pê nê muneqeşeyan wazenê muxalefetî cîya bikerê.''

Bayindirî wina dewam kerd: ''Hêrişê vera hetaê xoverdayoxan zêdînayî ke 2023 de zîhnîyet û sîyasetê xo de her ca de ca bikerê. Ma zanê ke nê waştişê înan zî semedê qikerdişê şarê kurdî yo.  Coka hêrişê kurdan, dezgehanê ci û rêxitinanê demokratîkan kenê. Hende binpaykerdişê heqan, feqîrîye problemê wînayên ê komelkî estî ke semedê nimitişê înan hêrişê HDP û kurdan kenê. Bi hêrişan rojdemî bedilnenî raştîyan nimenî. Muxalefetê Tirkîya zî gineno na dame ro la nika hedî hedî aye beno. HDP pê bawerîya xarîtaya rayîrê xo têgêreno.''

Bayindirî ard ziwana- ke tecrîdê vera Rayberê Şarê Kurdî Abdullah Ocalanî zî qirkerdişê vera kurdan reyde parelel yeno averdene û vat: ''Waro esasî yê semedê qirkerdişê kurdan sîstemê tecrîdî yê Îmraliyî yo. Ma tewirê vera pêvînayîşê telefonî yê birêz Ocalanî ra fehm kenê ke îqtîdarî polîtîkayê hêrişî yê vera kurdan û hêzanê demokrasîyî xorî kerdî. Sîstemê tecrîdî de israkerdiş Tirkîya do dahîna biancê mîyanê tarîtîye. Na nûqta de senî ke berpirsîyarîya ma pêrune esta ganî muxalefet û hêzê demokratîkî yê Tirkîya zî berpirsîyarîye bigerê xo ser.''

Keskîn Bayindirî derheqê Newroze zî nê vatî: ''Newroza 2013î ya ke vilaweka birêz Ocalanî ameye wendene senî tarîxî yo, Newroza 2021î zî wina yo. Şarê kurdî meydananê Newroza 2021î de mojna ke muxatabo sîyasî Abdullah Ocalan o. Na nûqtayêka zaf mumîm bî. Reyna wexto  ke operasyonê qirkerdişê sîyasîyî yê vera kurdan û HDPyî dewam kenê de şar wayîrê partîya xo ya sîyasîyî vejîya. Nê hetî ra zî Newroza muhîme bî. Şar birêz Ocalan sey îradeyê xo mojna û paştî da HDPyî. Nayî ra ganî hem ma hem zî îqtîdar mesajanê giranan vejo. Nê mesajê ke Newroze de vejîyayî werte do ziwan û karekterê prosesê verê ma bewlî bikerê.''