HDPyî bernameyê xo yê bi 3 safhayan 1ê êlule de çalakîya 'zîncîrê merdiman' ra dima qedîna. Hemserekê Partîya Herêman ê Demokratîkan (DBP) Keskîn Bayindir nê pêro xebatan de ca girewt.

Bayindirî ANFyî reyde qisey kerd û îfade kerd ke înan derheqê polîtîkayanê AKP-MHPyî yê vera kurdan de komelî rê zanayîşî dayî. Bayindirî vat: ''Ma xîret kerd ke seba têkoşînê hemparî zemînêk awan bikerê. Ma pêvînayîşanê xo ra dima teyît kerd ke seba pûçkerdişê faşîzmî  Têgêrayîşo Sîyasî yê Kurdan hêzêko tewr girîng o. Nê zî mesuldarîya ma kerde zixmêr.''

Bayindirî vist vîrî ke vera Rayberê Şarê Kurdî Abdullah Ocalanî tecrîdêko sîstematîl û hîra yeno caardene û vat: ''Ma verî ra vatbi ke tecrîdê vera Birêz Ocalanî do pêro komelî ra bêro vilakerdene. AKP-MHP bi tecrîdî şekil dayo karakterê îqtîdarê xo. Coka tecrîd hînî têna meseleya kurdan nîyo. Ganî pêro komelê Tirkîya vera tecrîdî vengê xo berz bikero.''

Bayindirî ard ziwan ke înan pêvînayîşanê xo de bale ante ser ke pêro meseleyê ekonomîk û sîyasîyî yê Tirkîya semedê tecrîdî ra çareser nêbenê. Bayindirî vat: ''Îqtîdar pê şerî krîzê ekonomîkî mîyan keno. Ganî muxalîf û hêzê demokrasî yê tirkan hînî naye rê vajê 'bes o.' Ma bi hawayêkê eşkerayî komelê Tirkîya rê vanê ke eke ewro sîyaseto demokratîl ê kurdan apey şoro faşîzm do binî ra bibo serdest. Coka êyê ke vera faşîzmî têkoşîn kenê ganî têgêrayîşê sîyasîyî yê kurdan reyde mil bi mil vinderê.''