Tepişteyo nêweş Bazo Yilmaz (67) vizêr şewe Zîndanê Riha de amebi qetilkerdene. Şaredaro verên ê Goganî û Endamê Meclîsê Şaredarîya Xaşfetî Bazo Yilmaz 12ê kanûna 2016 de çarçewa operasyonanê vera KCKyî de amebi destbendkerdene û dima tepişîyabi. 2018 de bi îdîaya 'endamîya rêxistine' cezaya zîndanî ya 9 serran dîyabî Yilmazî.

Cenazaya Bazoyî morgî ra ameye girewtene û bi konvoyê wesayîtan ameye berdene bi taxa Goganî ya qezaya Xalfetî ya Riha. Wekîlê HDPyî Omer Ocalan û Ayşe Surucu, Meclîsê Mayanê Haştîye yê Riha û bi hezaran kesî tewrê cenaza bîyî. 

Wekîl Omer Ocalanî cenaza de qisey kerd û vist vîrî ke Dezgehê Tipê Edlîyî (ATK) raporê 'eşkeno zîndan de bimano' dabi Yilmazî. Ocalanî vat: ''Mesuldarê nê mergî îqtîdar o. No mergêko normal nîyo cînayet o. Ma do bibê teqîbkerê dewaya embaz Bazoyî. Îradeyê şarî tîya de yo. Dewlete kurdan rê têna mergî layîq vînena. Embaz Bazoyî qetî vera zaliman milê xo çewt nêkerd.''

Wekîle Ayşe Surucuya ke wextêk Bazo Yilmaz û a pîya xebitîyabî, vat: ''Zîndanan ra her roje cenazayî vejîyenê. Nê wextê peyênî de 50 embazanê ma zîndan de dinyaya xo bedilnaye. Mesuldarê nê cenazayan îqtîdar o.'' 

Qiseykerdişan ra dima Bazo Yilmaz bi sloganê 'Şehîdî nêmirenî' ameye definkerdene. Definkerdişî ra dima girse şi keyeyê kekê Yilmazî Cafer Yilmazî. Keye şan Camîyê TOKÎ de tezîyeyan do qebul bikero.