Hepisxaneyanê Kurdistan û Tirkîye de, çalakîyê grevê vêşanîye yê girewteyê PKK û PAJK'î yê seba wedaritişê tecrîdkerdişê Rayberê Şarê Kurdî Abdullah Ocalanî dewam kenê. Xoverdayoxanê grevê vêşanîye ra yew zî Serdar Şahîn o ke Hepisxaneyê Hûmara 2’ine ya Tekîrdagî de 76 rojî yo grevê vêşanîye de yo.

Pîyê Şahînî Mehmet Emîn Şahînî serê şert û mercanê hepisxaneyî û çalakîya lajê xo de ANF’yî rê qisey kerd. Şahînî ard ziwan ke, roja ke lajê ey dest bi çalakîye kerdo ra heta nika teyna di reyî o dîyo û vat, moralê çalakwanan cade yo. Şahînî ard ziwan, domanê înan qerardar ê ke bedelê ci çi beno wa bibo, heta tecrîd nêro wedaritene ê do dest çalakîya xo ra ranêverdê.

MA LEYÊ DOMANANÊ XO DE YÊ

Şahînî da zanayene ke, domanê înan seba Rayberê xo bedenê xo dayo verê vêşanîye û vat, “Ma, keyeyê înan; peyê îradeyê înan de yê û paştdayîşê înan kenê. La ma nêeşkayî înan rê bibê cewab, na zî ma dejnena. Ma tever de nêeşkayê bibê vengê înan. Hêvîya înan ma ra estbîye la ma nêbê cewab. Wextê pêvînayîşê akerdeyî de rexneyê tewr girdî zî mi rê, pîyê xo rê kerdî. O hem lajê min o, hem zî hemrayê min o. Eke lajê mi na babete de mi rexne keno, o wext kêmasîya mi esta. Bedelê ci merdiş bo zî ma leyê domananê xo de yê û ma merdişî rê zî amade yê. Eke merdiş beno zî wa bi rûmet bo. Wa cuyêka bêanore nêba."

BAWERÎ Û QERARDARÎYA ÎNAN ZAF GIRD A

Pîyê Şahînî ard ziwan ke, lajê ey wexto ke bi telefon ci de qisey kerdo, vato rewşa înan baş a û vat, “Vano ke moralê înan sewîyêka tewr berze de yo. Roja 64’ine ya çalakîye de ez şîbîya pêvînayîş. Senî ke merdimêk Wareyanê Feraşînî de ciwîyeno û wayîrê weşîya baş o, enerjîk û rindek aseno, mi Serdarê xo zî wina dî. Labelê hevalêkê leyê înan, tansîyonê ey tim berz beno. Ey benê bi nêweşxane. Seba ke tedawî qebûl nêkeno, her reya  apey de anê. Persêka înan a tewr gird a ya ke 3-4 mengî yo ke awa germine nêdanê înan. Semaver de awe kenê germin û wina awe keno xo ro. Rojname û kitabanê înan nêdanê ci, labelê dimayo ke çalakîye dest pêkerda, tayê heqê înan ê ke nêdayê ci zî mecbûr mendê ke bidê. Bawerî û qerardarîya înan gird a.”

SEBA WAYÎRVEJÎYAYÎŞÊ LEYLA GUVENE VENGDAYÎŞ

Pîyê Şahînî derheqê xoverdayîşê Hemsereka KCD'yî û parlamentera HDP'yî ya Colemêrgî Leyla Guvene de zî qisey kerd û vat, “Hevala ma Leyla, rayberîya na çalakîya pîroze kerde. Çalakîya aye menga çarine de ya. Labelê ma Kurdê Vakurî keyeyanê xo de kewtî ra. Ma înan ra wayîr nêvejîyayî.  Eke meşte hepisxaneyan ra maftayêk bivejo, ne ez ne zî kesêko bîn nêeşkeno hesabê naye bido. Labelê tarîxê Kurdan do na roje binusno. Beno ke ez a roje nêvînena, labelê Egîdê ma yê qijî do bivînê. Tewr sere de sey keye ez xo rexne kena. Ma  eşkayêne na çalakîye girdêr bikerê. Ez ver de xo, dima zî hevalanê xo na babete de rexne kena. Ma çira nêeşkenê çîyêk bikerê?"

Şahînî da zanayene ke, rexneyê înan ê tewr girdî zî seba sîyasetê sîvîlî yê û vat, “Ma çira nêeşkenê bibê vengê hevalanê xo? Zere ra ke mafayî vejîyaye êdî qet manaya çîyêk zî nêmanena. Bêgûman weçînitiş seba ma muhîm o, labelê ma ewro şaredarîyan 99 ra zêde bikerê xo dest zî, eke hepsxaneyan de şahadetêk do bibo, tu qiymetê şaredarîyan nêmaneno.

Wexto ke nê têgêrayîşî, nê têkoşînî dest pê kerd, şaredarîyê ma bîyî? Teyna girêdayeyîya ma ya îdeolojîk û felsefîke bîye. Ganî ma hem weçînitişî ra hem zî grevê vêşanîye ra wayîrê bivejê.”