Şerê mabênê Talîban û hukmatê Afganîstanî ra dima bi hezaran afganî her roje verê xo danê Tirkîya. Serekê Komîsyonê Heqanê Multecîyan ê Baroyê Amedî avûkat Bawer Mizrakî rewşa afganan ser o Amed de tay cigêrayîşî kerdî. Mizrakî derheqê cigêrayîşê xo de ANFyî rê qisey kerd.

Mirakliyî da zanayene ke 40 serrî yo afganî hê koçê Tirkîya kenê û vat: ''Serranê peyênan de bi taybetî xeylêk afganan koçê Tirkîya kerd. Baroyê ma otogarêk zîyaret kerd ke tede afganî estbîy. Ma tesbît kerd ke koçberê Nîjerya û Iraqî zî zaf ê. Nê zafêr pê payan yenê, ge ge zî pê bedelê 800 heta hezar dolarî pê rayîrê qeçaxçîyan yenê. Hewteyêk de ê resenê Amedî. Afganî  mîyanê nê wextî de xeylêk meseleyê mendişî, weşîye û heqê cuye vînenê. Exlebî ê wazenê Amedî ra xo biresnê Îstanbul û Anqara.

Nê afganî anê ziwan ke ê semedê asayîşê ganê xo ameyî. Vanê ê wazenê şorê rojawanê Tirkîya û uca de bixebitê. Bêguman na rewşe bena sebebê îstîsmarî û xebitîyayîşê erjanî. Beno ke nê afganî hetê tay hêzanê paramîlîteran bişuxilîyê. Sûrîyeyîjan ra dima afganan reyde zî hem Tirkîya de hem zî Kurdîstan de vurîyayîşêko pîl o demokrafîk qewimîyeno. Nê kesî multecîyê bêsîstemî yê. Heqê înan çin ê. Ganî çarçewa huqûqî de afganî bibê wayîrê statuyî.

Tirkîya têna êyê ke Ewropa ra yenê sey multecî qebul kena. Goreyê Tirkîya êyê ke Rojhelatê Mîyanênî û cografyayanê bînan ra yenê multecî nîyê. Eke hîna zêdêr afganî bêrê ganî Tirkîya sey sûrîyeyîjan statuyêk bida înan zî.''