Rojnamegere Bêrîvan Bergareyî ya ke tewrê xeylêk çalakîyanê vera hêrişê îşxalî yê dewleta tirke bîye 13ê teşrîna verêne ya 2020î de hetê PDKyî ra ameye tepiştene û nidzê 2 serran zîndan de mende, derheqê tepişteyanê Behdînan û îşkenceyê PDKyî de ANFyî rê qisey kerd.

Bêrîvane Bergareyî vist vîrî ke xeylêk rojnameger, aktîvîst, azadîwaştox û welatperwerî seba ke vera hêrişê îşxalî yê dewleta tirke çalakîyê protestoyî kerdî hetê PDKyî ra ameyî tepiştene û nê vatî: ''Her kes zano ke îqtîdarê PDKyî merdimanê azadîwaştoxan ra terseno ke raştîyan û sûcanê ci vejeno werte. Ez zî ameya tepiştene. Seke yeno zanayene 2019î ra nata aktîvîstî û rojnamegerî yenê tepiştene. A serre 80 kesî ameyî tepiştene.

Bitaybetî kabîneyê Mesrur Barzanî keno vengê azadîye bibirno. Behdînan de raşta zî hîsî azadîye nêbendo. Kam ke vera hêrişê îşxalê dewleta tirke vejîya tepişîya. Seba ke mi malê Tirkîya bokot kerdî ez tepîşîyaya. Bi serran o ma vanê malê tirkan jehrin ê û dewleta tirke wazena kurdan çîn bikero. Keyeyê Barzanîyî 1980yan ra nata  bi seyan çalakwan û roşnvîrî qetil kerdî. PDKyî şarê Şêladizê şehîd kerd, aktîvîst û rojnamegerî tepiştî.

Şêrwan Şêrwanî û embazê ci seba ke waştêne raştîyan vejê meydan ameyî tepiştene. Behdînan de heme kesê ke ameyî tepiştene bi seneryoyan esîr ameyî girewtene. Gama ke ez tepişîyaya mi sebebê ci nêzanayêne. Dima ra mi fam kerd ke mesele rexnekerdişê hukmatî yo. Seba ke ez vera îşxalkeran vejîyaya ke tim herra ma danê bombayan ver û şarê ma şehîd kenê, ez ameya tepiştene.

Zîndananê PDKyî de derheqê heqanê merdiman de çîk çîn o. Qanûnê huqûqê mîyanneteweyîyî yenê binpaykerdene. Yeno vatene ke zîndanê Vakur û Rojhelatê Kurdîstanî xirab ê la ez vana ke zîndanê tewr xirabî yê PDKyî yê. Çeteyê DAÎŞî yê ke rolê înan mergê pêmergeyande est o înan rê hurmet kenê la kesanê azadîwaştoxan rê îşkence kenê. Çeteyî bi saetan telefon kenê la 6 aşmî destûr nêda ez telafon bikerî. Dewleta tirke dişmenê kurdan a la PDK dewleta tirke ra zafêr faşîst o û vera kurdan beter o.

Seba ke ez kurd a ez ameya hepskerdene. Bi îdîaya mi asayîşê heram Kurdîsanî xeripnayo ez ameya tepiştene la eslê xo de PDKyo ke dişmen ardo herra Başûrî û asayîş xeripnayo ganî bêro muhakemekerdene.  Zîndananê PDKyî de îşkenceyo fîzîkî û psîkolojîk  est o. Gama ke ez tepişîyaya 15 rojî ez hucreyêke de menda, hende tenge bî ke ez tede nêeşkayene nefes bîgêrî. Dima înan ez berda cayê çeteyan û kiştoxan ke îradeyê bişikinê mi bikerê îtîrafkar. Ez kewta grevê vêşanîye. Seba ke dewaya mi rojdemê çapemenîye de bî,çalakîya mi ra tersayêne. Bado ke çalakîya mi 40 rojî dewam kerd înan ez kişta, awa serdine kerdî mi ro. Hela ke heyetê heqanê merdiman zîndanî zîyaret kerdî seba ke rêçanê îşkenceyî mevînê, PDK mi înan ra nimit. Dewaya Behdînan de ame vînayene ke welat de edalet û huqûq çîn ê, memleketê destê partîyan de yo.

Îqtîdarê Başûrê Kurdîstanî bi programanê televîzyonî perwerdeyê dewleta tirke kirişeno her keye, bi nê rayîrî wazenê nasname û kulturê kurdan werte ra wedarê. PDK bi rayîrê medya şarî keno bêhêvî, ciwanan keno bêîrade, şarî de heskerdişê herre  û welatî kerdo zehîf. Heme kanalê PDKyî xizmetê dewleta tirke kenê.  Bi hewayêkê sîstemkî kenê ke kulturê kurdan çîn bikerê.Keyeyê Barzanî ziraro tewr pîl dano dewaya kurdan. Keyeyê Barzanîyî ra nêbîyenî inkey her hetê Kurdîstanî de kurdî resaybî heqanê xo. Keyeyê Barzanî semedê pawitişê menfeatê xo vera kurda şer keno. Kam ke wazeno waştîyan vejo werte beno hedefê îqtîdarî. Ganî ma sey neteweyê kurdan bibê yew û vera zextan vejîyê.''