Roja verêne ya Rojeyê Muharemî de Anqara de bi hawayêkê hemwextî hêrişê emxaneyê Ana Fatma, Şahê Merdan, Komeleya Dewa Gokçebali û Weqfa Elewîyanê Bektaşîyan a Terekeme amebi kerdene.Verê Sersefîrîya Tirkîya ya Berlinî ya Almanya de hêrişê vera dezgehanê elewîyan û cemxaneyan ameyî protestokerdene.

Dezgehanê elewîyan ê Berlinî ra Cemxaneyê Komelê Elewîyan ê Berlinî, Komelê Dêrsimî, Federasyonê Elewîyan ê Demokratîkan-FEDA, NAV-BERLIN û endamê Meclîsê Cinîyan ê Dest-Danî zî tewrê çalakîye bîyî. Çalakîye de hêrişî ameyî şermezarkerdene û Pîr Îsmaîl Erolî eşkerayîye wende.

Erolî ard ziwan ke dewleta tirke vera elewîyan Qirkerdişê Dêrsim, Koçgirî, Sêwaz,Çorum, Gezî kerdî û heta ke şarê bînî azad nêbê elewîyî zî do azad nêbê. Erolî vist vîrî ke hukmatê AKP-MHPyî 2023 ra verî wazeno alozîye vejo, coka elewîyan keno hedef. Erolî vat: ''Ma hukmatî hişyar kenê ke seba ke cemxaneyan nêşinasneno û statuyî nêdano elewîyan nê hêrişan rê zemînêk awan keno. Waştişê ma qebul bikerê û îbadetxaneyanê ma bişinasnê. Destê xo medê bawerî û îbadetxaneyanê ma. Pênaseyê ma bişinasnê!''