Çalakîya grevê vêşanîye ke hetê grûbêka Kurdistanijan ra paytextê Almanya Berlîn de amîbî destpêkerdene kewte roja xo ya hîrêyine. Çalakwananê ke ANFyî rê qisey kerd mesajê “heta serek Apo bireso azadîya xo do mucadeleyê ma dewam bikero” da.
Grevê vêşanîye ke perey raşteyê Brandenburg Torî (Berê Brandenburgî) de ame destpêkerdene roja xo ya hîrêyine de yo. Grevo ke bi grûbêka Kurdistanijan dest pêkerd û bi 15 kesan dewam keno yeno pawitene ke 10 rojî dewam bikero.
‘MA ÎZOLASYONÊ SERÊ SEREK APOYÎ QEBÛL NÊKENÊ’
Bi serkêşîya kesanê ke tewrê grevî bîyê vizêr raşteyê Brandenburg Torî de mîtîngêk ame viraştene. Çalakwanan bi pankart û dovîzan bale ante bi amacê grevan. Meryem Laçîna ke Kasel ra tewrê mîtîngî bîbî wina qisey kerd: “Ma îzolasyonê serê serek Apoyî bi tu hawayêk qebûl nêkenê. Heta ma serekê xo azad bikerê ma do çalakîyanê xo rê dewam bikerê. Tu statuyêka şarê ma çinya. Ma zî dewlet û qanûnanê ke heqanê ma nas nêkenê qebûl nêkenê.”
Kurdistanija bi nameyê Kadrîye ya ke şaristanê Halle ra tewrê çalakîye bîye vat: “Sey her mayan ez zî hetê aşitî de ya. Peynîya nê şerî de bêguman do aşitî bêro. Ma qerarê Amerîka zî protessto kenê.” Ancî şaristanê Halle ra aktîvîst Ahmet Şaylemezî zî wina qisey kerd: “Çi kesê ke xo ra vanê demokrat yan zî azadîperwer ganî nê çalakîyan rê paştî bidê û tewrê înan bibê.” Menders Erturko ke şaristanê Leipzigî ra tewrê mîtîngî bibi zî heman waştişî ardî ziwan û vat heta azadîya Ocalanî do çalakîyanê xo bidê dewamkerdene.
Hetêna ra çalakwanî şîyî serdana di camîyanê ke Berlîn de bî û waşt ke seba grevê vêşanîye paştî bêro dayene. Melayan zî xutbeyanê xo de ca da grevanê vêşanîyan û ard ziwan ke ganî bêrê paştîdayene.
Ewro do saetanê nîmrojî de raşteyê Brandenburg Torî (Berê Brandenburgî) de mîtîngêk bêro viraştene.
