Paytextê Almanya Berlîn de  û bajarê Churî yê Swîsre de bi aktîvetayan şehîdî ameyî vîrardene.

Seba îdarekaranê PYDyî Şîlan Kobanê (Meysa Baqî), Zekerîya (Zekerîya Îbrahîm), Fuat (Hîkmet Tokmak), Cemîl (Nebo Alî) û Ciwan (Haci Cuma Alî) yê ke 29ê Teşrîna peyêne de Mosil de damêk de cuya xo vîndî kerdebî Berlîn de vîrardişêk ame organîzekerdene.

Kîtleyêka qerebalixe tewrê vîrardişo ke komela Merkezê Cimatê Kurdan yê Demokratîkî (NAV-DEM) de ame organîzekerdene bîye. Vîrardiş de aktîvîstê ke Berlîn de seba wedartişê tecrîdê serê rayberê şarê Kurdî Abdullah Ocalanî kewtê grevê vêşanîye zî ca girewt. Temsîlkaranê PYDyî Bavê Kawa, Salîh Hecî û Koze Çalkan derheqê şorişê Rojava û tesîrê Ocalan û PKKyî nê şorişî ser o qisey kerd. Salîh Hecî qiseykerdişê xo de wina vat: “Şehîdê sembolê serkewtişî yê, ma ancax bi berzkerdişê mucadeleyî eşkenê mîrasê înan rê wayîr vejîyê.” Aktîvîstanê grevê vêşanîye zî ard ziwan ke grevê înan roja 4. de yo û seba paştîdayîşî veng da.

Nê mabênî de bi serkêşîya 18 aktîvîstanê ke grevê vêşanîye de yê raşteyê Brandenburg Torî de mîtîngêk ame viraştene. Aktîvîstan waşt ke tavilî tecrîdê serê Ocalanî bêro wedartene. Yeno pawitene ke aktîvîstî ewro saet 9 ra tepîya şirê dêranê ke ayînê Yewşemeyî tede yenê viraştene û seba paştîdayîşê çalakîya xo veng bidê.

CHUR

Gerîlayê HPGyî Yusûf Tunç (Azîz Çirav) û Murat Ozdemîro (Şoreş Roza) ke 17ê Teşrîna verêne de bejikê şaristanekê Komurî yê Semsûrî de şehîd kewtîbî şaristanê Churî yê Swîsre de ameyî vîrardene. Vîrardişo ke lokalê Chur-CDKyî de ame viraştene bi deqeyêk rêzgirewtişî dest pêkerd û bi sînevîzonêk ke qalê cuya Yusûf Tunç (Azîz Çirav) û Murat Ozdemîrî (Şoreş Roza) keno dewam kerd. Qiseykerdişê ke bi nameyê merdimanê şehîdan ameyî kerdene de vajîya ke resnayîşê mucadeleyê birûmetî yê şehîdanê xo bi serkewtişî deynê ma yo. Aktîvîte dimayê qiseykerdişanê vîrardişî ra bi slogananê “Şehîdî nêmirenê” ameye qedênayene.